班亞弗力（BenAffleck）同籮霸珍妮花洛庇絲（JenniferLopez）經常糖黐豆，而班仔老友麥迪文（MattDamon）最近原來亦靜靜雞換咗畫，佢嘅新歡正係《狂野極速》索女伊娃文迪絲（EvaMendes），佢哋兩對情侶重一齊去咗拉斯維加斯過新年㖭。
麥迪文近年嘅私生活冇班仔咁高調，早排重靜靜咁同聚少離多嘅女友OdessaWhitmire分手，不過麥迪文始終都係血氣方剛嘅男人，最近就有人發現呢位男星同《狂野極速》女主角伊娃文迪絲發展超友誼關係。
早幾日我羅拉先聽到班仔帶埋籮霸去拉斯維加斯過新年，麥迪文亦有同行，不過佢冇做電燈膽，事關麥迪文有伊娃做伴，聽講佢兩個大除夕就同班仔籮霸一齊倒數，但到元旦就喺Bellagio酒店享受二人世界。
麥迪文上年因為同伊娃合作喜劇《StuckOnYou》而認識，之前都傳過佢哋兩個有路，雖然雙方發言人未有任何回應，但外國傳媒已經估緊佢兩個會唔會快過班仔同籮霸開花結果。