新年第一個周末，仍然充滿假期氣氛，沙田陳師奶與家人朋友約埋一齊上賭船，住宿一晚，星期日下午回港，一返到嚟就搵人去酒店食自助餐，原來係佢兩個仔嘈喧巴閉，話困在船上，冇啖好食，啲類似飛機餐完全冇味道咁講。陳師奶惟有請佢哋去酒店食番餐補數。陳師奶話：「我哋又唔鍾意賭錢，出到公海，冇乜好活動，兼夾風大浪大，細路暈船浪，冇晒癮，呢啲出海節目真係唔啱一家大細。」
佢一路講，一路睇《蘋果日報》副刊，於是問佢：「今日街市行情版係新嘅，啱唔啱你一家睇？」陳師奶話：「有用，亦都冇用。有用在於增加談話資料，同其他師奶講餸菜價錢，冇用嘅就係我唔一定會以報紙標價買到蔬菜，因為我去到就近嘅超市或者街市就買，邊會周圍格價喎，如果九龍城街市真係平啲，我都唔肯搭巴士由沙田去九龍城啦。又或者行完惠康再去行百佳，逐間買一樣咩，譬如喺百佳買急凍豬扒，又去惠康買番茄？煩唔煩啲呀？好多時間嚟謀殺呀！」
陳師奶話冇乜用啫，佢就留意到超級市場有啲唔多一樣，有一次佢行超市，就見到一個買家（shopper）用張紙巾遮住半塊面，口中念念有詞，細細聲講：「鴨梨個八一個，新奇士橙兩個九……好似對住個微型錄音機錄音，唔通呢位仁姐係無間道，抑或係另外一間超市派嚟嘅物價偵探？《蘋果》出行情版，最唔得閒嘅竟然係超市職員。