內地名導演馮小剛拍完賀歲片《手機》之後，最近佢又開始籌備四月另一部新戲《天下無賊》，據聞會由劉德華同葛優主演。之前有傳過部戲會搵周星馳嚟做，但最後落喺華仔手上，聽講話馮導演上年中籌備拍呢部戲嗰陣，梅艷芳曾熱心地向導演推介搵華仔演出。
不過噚日華仔經理人公司嘅譚小姐就話唔明點解會有咁多傳聞，但佢就承認馮導演有接觸過華仔拍呢部戲，但就未正式落實。
呢部戲其實係一個浪子回頭嘅古仔，華仔飾演大賊王薄，佢同女賊王麗係戀人，有日佢哋喺火車度遇到一個叫儍根（葛優演）嘅農民，之後重俾儍根嘅善良打動，唔單止冇打劫佢，重喺火車上一路保護佢，等佢唔使俾其他賊黨打劫㖭。
姚嘉妮噚日出席新城電台《一個靚墟》嘅訪問，講吓屋企嘅一班狗仔之餘，順便講吓錢嘉樂嘅「壞話」。嘉莉話同嘉樂合作拍《花樣中年》好開心，最辛苦都係忍笑。而姚嘉妮同錢嘉樂喺戲入面重有接吻戲。問到佢男朋友林祖輝會唔會嬲，姚嘉妮就大條道理話：「佢咪拍（接吻戲）得重多過我，講親佢實唔夠我講。」
李克勤同譚詠麟日前接受商台訪問，眾所周知克勤同阿倫嘅舞技麻麻，要向劉德華請教，克勤話：「我每次做演唱會，如果有跳舞都會搵華仔嚟睇，佢話得我就有信心。」講到「左麟右李」咁紅，吸引到唔少電影商向佢哋招手，阿倫話：「真係有幾個劇本等緊我哋，有笑片，有關足球又有，談判專家嘅又有。」
王力宏日前成為台灣一隻食品嘅代言人，拍攝廣告嗰日，廣告商搵咗一名九歲嘅小朋友同佢一齊合作拍攝。
王力宏對呢位小朋友嘅演技大感滿意之餘，重揚言甘拜下風，佢以國語笑住話：「有人搶飯碗啊，看完廣告那有人記得我。」
李龍基、朱咪咪、曾航生一班好耐冇見嘅歌手，噚日喺佐敦道一間酒吧開記者會，宣布下月七、八日開兩場「金曲唱聚聲雅廊」演唱會，李龍基話會分開男女歌手一人一場，比較吓邊場賣飛多啲，佢重話：「我哋重打算唱梅姐（梅艷芳）嘅歌，作為一種紀念。」
徐子淇返香港過聖誕同除夕，轉眼放完半個月嘅假期，佢又要收拾心情返英國繼續學業。子淇噚日喺銅鑼灣話：「呢次返香港玩得好開心，我次次都唔捨得走，再下一次返嚟應該會係暑假，因為復活節要準備考試，我要留喺英國溫書。」
