DV機應該點樣揀？有啲人Sell外形得意古怪，有啲又話同數碼相機玩Crossover，但講到真正DV機嘅攝錄功能，就好似建樹不大！JVC最新推GR-D系列DV機，佢新加嘅2.5吋反眩光LCD，在強烈日光下，一樣可以睇得清清楚楚；新開發3DNR影像技術，可以大大減輕暗光拍攝時30%的信噪，儼如黑夜、白晝拍攝之王；機價唔算貴，$4,980一般入門價，不過DV功能就有Pro級誘惑！
記者：朱崇德 攝影：Manny ImageGirl：Yuko（Space2）
今次JVC一口氣有3部新機推出，分別為GR-D73/53/33，主要機身配置差唔多一樣，D73屬頂級型號（$4,980），主要多出了80萬像素碼相機功能、外置SD/MMC卡插槽、USB插口同《ImageMixer》錄像編輯軟件；D53就少了數碼相機及外置記憶卡插槽，但機價平啲，做$4,280；至於D33則屬齋版DV機，今日就集中講最強嘅GR-D73。
JVC所出的入門級DV機一向都係走實而不華路線，今次3部新機中，以D73最為搶眼；6吋80萬像素CCD、16×光學變焦鏡頭（700倍數碼變焦）、1,024×768解像度數碼相機功能，AV場內同規格嘅DV機，閒閒哋都要開價$5,000-$6,000餘，以精明消費角度，已經先下一城！
至於實用性，這枚80萬像素CCD已經可以輕易做出520線的錄像效果，等於時下一般DVD畫質，用嚟自製DVD影像光碟，已可應付餘裕！
至於數碼相機功能，在3部機中只屬D73尊享！80萬像素的CDD，最高可擷取到1,024×768的靜態影像。講真，呢個數值已經夠你做Wallpaper、曬2R相片或數碼剪片時的過場相，相對時下勁Sell有100萬至300萬像素影能力的DV機，機價起碼要$7,000-$12,000，以差價計，絕對夠你買多部半專業級DC！
D73還內置有多種場境拍攝模式，例如快門喺1/250-1/4,000的Sport、背光情況下作曝光補償的Spotlight、褐色懷舊Feel的Sepia、影夜景時需要長時間曝光的Twilight，普通民用拍攝，已經相當夠玩！
D73另一強銷賣點，就係跟機送《ImageMixer》剪接軟件，不論DV帶的動態影像，或是SD?MMC記憶卡內的靜態影像，都可在軟件內作剪接用途；介面同現時最流行嘅《Premiere》有幾分似，簡化得嚟更易上手。剪輯影像、配音樂、人聲音軌、製作影碟目錄選單，全部有齊，最開心係Fadein?Fadeout過場Effect都有成46種選擇，操作簡單，都可以玩得好Pro。軟件另一強處，係可以將Mic-in旁白、AudioCD、MP3音樂，轉化配樂的WAVE格式，玩法千變萬化。
大白天：屏幕睇得清
DV機在外拍時最頭痛嘅問題，就係LCD勁反光，令影像模糊不清，拍攝時只好估估吓！不過這個GR-D系列新機，都新加入了一個2.5吋反眩光LCD，好處係就算在室外的強光環境下，都可以做到清晰的彩色畫像；筆者曾作實地測試，在戶外的強光下，這個反眩光LCD的影像及色彩清晰度，起碼可以保持70-80%以上，相對同行的攝影師部DC，就要用LCD轉用觀景窗拍攝了！
夜攝：噪訊減三成
不論數碼相機或DV機，CCD嘅頭號強敵就係喺暗黑環境下拍攝，影像「起渣」、「微粒粗」實在無可避免，所以3部新機都加入了3DNR降噪訊功能，好處是能減少視頻影像的噪訊達30%。平心而論，筆者家中都有一部陳年JVC嘅DV機，相較新嘅3DNR功能，的確令黑夜拍攝的影像起到清晰作用！不過簡單數學問題，100減30，70呢個數值，都係有待進一步改善囉！
JVC
查詢電話：27328220
