為梅艷芳籌辦後事的治喪委員會，已決定用梅艷芳於九四年時為唱片拍攝的一輯相做靈堂大相，而該張《是這樣的》大碟，當年推出時曾甚受歡迎，足證阿梅在樂壇上的光芒。而當時梅小惠與阮兆祥在唱片公司安排下，亦曾經模仿當時阿梅的造型出唱片。
梅小惠昨日在將軍澳電視廣播城說：「喺九四年時，有唱片公司搵我同祥仔出碟，製作班底同樣係當時幫梅姐出碟嘅人，所以一切造型都模仿得好相似，梅姐都知道我哋模仿佢，但佢冇介意，重借咗成套衫同頂帽畀我。我記得當時我重好肥，件衫扣唔埋鈕，頂帽又戴唔落，但當其時因為模仿梅姐唱片封套關係，我哋隻碟都幾好銷量㗎，𠵱家梅姐去咗真係好可惜。」