港股在萬三關口爭持，收市仍有進帳，恒指升30點，成交再大增至285億元。國企終於出現調整，國指收5182，跌208點，跌幅3.8%。
國指由4050起步，大升1400點後，噚日先係較像樣的調整，不過，唔見有基金大手沽貨，反而在低位時重見到佢哋繼續收集，睇嚟後市都係要上。同芬佬收料，佢哋話國企調整係好正常，但唔跌得幾多，估計兩三日就會到底，之後再起過，升勢一樣會好勁，目標仍然係石油、石化同金屬股。中石油（857）收4.55元，跌0.3元，「些那」唔多，每個位都只係一兩球，同未大升前個個位都十幾球，真係有天淵之別，呢個現象，其實只係解釋一樣嘢，就係貨源已嚴重歸邊，而芬佬對後市睇得好好，聽佢哋口風，中石油喺未來兩三個月，好大機會再扯高40%至50%。
市場資金氾濫，個別實力二三線股，亦開始有大盤追捧，金威（910）同佑威（627）呢兩個納米兄弟，齊齊報升，買盤則以佑威更勁，收44.5仙，升1仙，走勢已去到突破邊緣，一升破44.5仙，中期大升浪展開，呢隻股已收集咗年多，形成大型的複式頭肩底，照度上去，起碼可見0.7元。
其實，0.7元對佑威而言，亦只係一個中期目標，佑威的納米業務，發展極其迅速，04年度（3月年結）已開始提供可觀盈利貢獻，05年度打後，會係連續幾年的高增長期，股價不難衝破02年中的0.95元，向1.0元大關進發。
佑威全速拓展海外市場，最近與日本一大型羽絨生產商洽談合作，將產品進行納米處理，效果理想，預期可為羽絨生產行業帶來突破，而佑威本身亦成功開拓納米在紡織領域以外的應用層面。佑威除收取合作夥伴的專利費用外，並分享產品增值的收益，小數怕長計，此方面的盈利會極具爆炸性。
04年度的上半年，佑威獲利3783萬元，大升98%，估計全年盈利可上升到9000萬元，大升277%，每股盈利7仙（經配售新股加權計），預測PE只為6.3倍。下年度，盈利預計可上升到1.3億元，每股盈利9.3仙，PE更調低到不足4.8倍。佑威納米業務煞食，若然分拆，特殊利潤會好可觀。
郭兆誠