只映一場即日落畫的施政報告不是《魔戒三部曲》，公映長度差不多，令你忍尿忍得好辛苦兼不耐煩。不過《魔戒》好睇，冒住腎虧與膀肛炎的風險也值得捧場。施政報告由頭到尾，由比哈比族人高幾吋的董特首主持，場面調度是零，佈景道具悶到你飛起，最慘係全場得個齋talk，史詩式正邪大戰的鏡頭欠奉。香港沒人才，沒辦法。香港立法會也不是新西蘭外景現場，立法會外沒有精靈仙子和勇士；King沒有return，只有頸上掛着足金吊嘴叼住香煙粗聲大氣到處拍照的自由行豪客。
施政報告也不是《無間道》，你搵勻坐在後排撐場的局長猛人，雖然個個西裝骨骨，姿態眼神無個似梁朝偉或者劉德華。一直發言那位，在睡魔入侵下你眼花花睇錯，覺得他幾似曾志偉。但對白內容窒窒吓犯口吃，非常儍強。你想盡情儍笑，但好驚被爆樽扑穿頭。《無間道》玩director'scut加長版本，你開心幻想自己是導演，落手cut的不是條片，而係主角個老懵頭！
施政報告也不是《真的戀愛了》，報告裏面沒有愛，只講金不講心。你覺得它接近《種計》，電影原名是《MatchstickMen》，擺明係老千，比楊千樺更想千你入局。注意Men是眾數，撐場那班西裝友原來全部是同謀，一致唱好報告，跟祈福黨無分別。睇到終場，影癡醒起重做的《亂世佳人》，噢，對04施政報告的評價，是戲中經典對白Idon'tgiveadamn！