梅艷芳上周因病逝世，日前其生前好友已為她選了一張從未曝光的唱片宣傳照，作為靈堂上的遺照。而該張照片上的阿梅本來是手執香煙的，但因她與好友張國榮曾拍過宣揚禁煙的短片，故阿梅的遺照會與去年四月張國榮的遺照一樣，用電腦執去手中的香煙。
梅艷芳上周病逝後，已定於下周日（十一日）公祭，翌日出殯，今次為阿梅籌辦喪事的治喪委員會，前晚終選出遺照及出殯日紀念特刊的封面照。
阿梅生前的經理人王敏慧昨日接受電話訪問時說：「阿梅張靈堂遺照，係喺佢九四年其中一張大碟《是這樣的》嘅封套內頁搵出嚟嘅，嗰張相阿梅揸住支煙，不過支煙我哋會搵人執走去。初時我哋都只係諗住搵呢張相做場刊封面照，冇諗過做遺照，但後來搵嚟搵去，都係覺得呢張相最好，所以大家就決定場刊同遺照都係用呢張相。」
梅艷芳與好友張國榮之間，果然有一份難以言喻的緣份，繼日前有報道指她的喪禮布置會仿效張國榮去年四月的喪禮外，現在連遺照都選了一輯曾經在電影《金枝玉葉2》中出現過的照片，而張國榮的遺照也是取自《金枝玉葉》的劇照。
更湊巧的是兩位已故巨星的親友所選的遺照，相中人都是手執香煙，但因吸煙危害健康，而二人生前又曾經為港台拍過一齣反吸煙的宣傳短片《煙飛煙滅》，故此二人的遺照都刻意除去香煙，只是張國榮的遺照只需裁去部份照片，而梅艷芳的遺照則需利用電腦執走香煙。
當年為梅艷芳拍攝該輯唱片封面照的攝影師FancoLai，昨日接受記者電話訪問時說：「日前阿梅身邊嘅人聯絡過我，要求攞番九四年呢輯相嚟用，之後佢哋揀咗一張唱片封套冇選用到嘅相嚟用，其實嗰張相同見過街嗰張好接近，只係眼神唔同啫！張相放大後，佢哋要求盡量將支煙執咗去，咁我就照佢哋意思做。
「當年劉培基為阿梅設計呢個女中豪傑嘅男性造型，阿梅自己都好鍾意，原本嘅設計係唔使揸煙，係我提議揸煙可以有型啲啫！當時阿梅對影出來嘅相同造型好滿意。」
而治喪委員會成員何錦華昨日則在電話中說：「劉培基選用呢張相做遺照，係想表現阿梅本身嘅媚態之外，亦想畀人睇到佢係女中豪傑嘅一面。等個喪禮結束後，香港電影資料館準備為阿梅搞一個《梅艷芳電影回顧展》，到時會放映阿梅生前一啲比較有代表性嘅作品，不過有關方面會先徵得佢屋企人同意先舉行嘅。」
