明明份份報紙都大大隻字話沙士重臨，但本地股市似乎唔受影響，除咗因為中國鋁業（2600）配股，令部份國企股股價回落之外，其餘唔少炒股照樣大炒特炒，噚日表現最激當然係光大控股（165）一門三傑。
近期上市的新股幾乎隻隻都有好表現，所以有啲新股雖然名氣唔大，但招股仍然反應奇佳，好似將於下周二掛牌的中國綠色食品（904），據講公開認購部份，錄得1500倍的超額認購，實在令人頗為意外。
今次綠色食品以每股1.28元，發行1.5億股新股，集資1.92億元，將於下周二掛牌。
經紀黃話，今次隻股咁好反應，據講主要有人在背後推波助瀾，加上市場氣氛實在好，唔少投資者在股市都有斬獲，而且綠色食品PE定價唔夠7倍，夠晒便宜，所以投資者紛紛捧場，隻股去到家陣，分分鐘已經係自動波。
不過，經紀黃亦提出警告，家陣認購新股玩吓無妨，但要提防首日之後可能會無以為繼，記住見好要收。
慕容小初