03年7.1之後，保皇黨大失民心，結果區選大敗。咁民建聯散咗，工聯會點會無事呢？職工盟李卓人話真係有口難言。
按阿人嘅分析，工聯會已經死咗一半，但係好可惜，好多人未識得分辨兩個工會，有人甚至叫阿人做「工聯會副理事長」，問你死未？
有見及此，阿人哋係元旦日遊行期間，乘機加強宣傳，叫大家識清楚，職工盟係有份參與7.1遊行嗰一個民主工會；而工聯會就係喺維園慶回歸六周年嗰個保皇嘅偽工會。
不過，佢都相信功效不大，因為啲工人認人不認會，有事會打電話要佢哋幫手，重會問「工聯會呀」，真係傷。話就話左派工會受到衝擊，但係工會始終較忠心，好少叛變轉投民主派。不過，「中華人民共和國」同中華民國，喺國際上，夠好多鬼佬唔識分喇。
元旦遊行有個怪現象，見到好多團體打住基層旗號，甚至有一個叫做「基層大學」，原來啲基層覺得7.1大遊行被人等同咗中產大遊行，好似冇佢哋份，所以今次一定要攞番個彩，唔好蝕底。
傳真︰2623-9278
電郵︰