最近唔少新盤好鍾意以法國風情做賣點，噚日開放現樓嘅元朗帝庭居，都係用法國南部小鎮做主題，喺公眾地方整咗好多相關嘅布置。為咗配合環境，佢哋交樓小組嘅九位女職員着住充滿小鎮風情嘅民族服裝，重紮起兩條孖辮，造型特別。
信和執行董事余惠偉話，會所同公眾地方都加咗碼，落重本令屋苑更有法國特色，例如入門口側邊嘅休閒處，行人路旁嘅坐椅、水池，都好有法國特色。至於會所設施，有健身室、香薰水療按摩池、噴射式按摩池等。
另外，為咗慶祝入伙，發展商準備咗一盒入伙禮物送畀買家，包括紅酒同香薰等，重整咗本會所設施「寫真集」。蘭西記得，介紹會所設施嘅書，喺舊年帝庭居賣嘅時候重未有得睇。
自由行令本港經濟重出生天，酒樓食肆頓時人山人海。以阿一鮑魚享譽飲食界嘅楊貫一，佢徒弟林永春，以十七萬租咗灣仔香港華美酒店三樓一萬呎，開設第二間食肆，走高檔路線，提供鮑參翅肚呢類菜式。聽利嘉閣助理董事謝仲偉講，呢間高級食府租期六年，係林永春開嘅第二間食肆，主力係做自由行旅客嘅生意。
佢透露，林永春十年前已經喺北角開咗第一間食肆，重一直做到𠵱家。
承接舊年旺勢，今年豪宅市道仍備受看好。聽聞，電盈準備第二季再度出擊，推售成名作薄扶林貝沙灣第三期，同時亦為山頂歌賦山道豪宅盤做籌備工夫。為攞最前線資料，據聞，電盈開始搵代理食飯交流，掌握第一手資料。
電盈顏金施話，貝沙灣三至五期，打算喺第二季同第四季，每季推售二百五十個單位。
不過，推貝沙灣之前，可能喺第二季先推歌賦山道七個五千幾至八千方呎巨型豪宅，以現樓方式賣，意向呎價兩萬蚊。電盈顏金施話，風水佬話今年旺西南方，所以山頂同埋西南面嘅貝沙灣都應該受惠。
美聯物業董事級人馬近期頻頻出擊，入市買樓。美聯嘅九龍區董事羅國安，同埋新界區董事布少明，噚日齊齊合資咗近一千萬，買何文田君頤峰第三座高層A單位，面積一千七百九十四方呎，呎價五千五百七十四蚊。
除咗呢兩位董事之外，美聯物業早前都有兩個董事同樣買入君頤峰，就係工商部營業董事黃子華，同埋寫字樓區域營業董事黃漢成。佢哋睇好豪宅市道，親身入市，對個樓市投下信心一票咁話。
見到咁多下屬入市，唔知會唔會加快集團主席黃建業拍板買君頤峰嘅決定呢？
投資物業市場喺舊年走勢良好，車位都有大手買賣同摸貨獲利。中原地產統計所得，去年逾五百萬嘅車位買賣共有八宗登記，總值超過一億三千萬，數量同金額都比○二年升一點六倍。
最大手嘅登記係鰂魚涌海光街五至十三號停車場，四十個車位成交價二千四百二十萬。而深水埗金必多大廈有二十九個車位，喺舊年八月易手，成交價二千零三十八萬，但一個月內即以二千一百四十萬摸出，賺咗一百零二萬。
另外，○二年賣出約二百五十個車位，套現七千萬嘅新地，舊年只賣出約一百個，套現約三千萬。
蘭西
電郵地址：