新車速報：<br>豐田CorollaRunx1.8ZAerotourer狠辣房跑

新車速報：
豐田CorollaRunx1.8ZAerotourer狠辣房跑

豐田旗下Corolla車系繁衍甚多，最為香港車迷所熟悉嘅，除會係四門家庭房車及五門RV嘅CorollaVerso外，早前更不乏有水貨車商，引入咗五門旅行車CorollaFielder，惟較少人留意到響車系中，原來重有一部至Top嘅五門房跑車CorollaRunx。早陣子，廠方更替其推出Facelifted新版，變得更富個性之餘，還透現出一份辛辣味呢！

記者、攝影：陳偉林

豐田CorollaRunx1.8ZAerotourer規格
引擎：1795cc直4DOHC
馬力：190ps/7600rpm
扭力：18.4kgm/6800rpm
傳動：6前速手波，前輪驅動
懸掛：（前）麥花臣支柱（後）扭力連桿
制動：（前）透氣碟（後）碟式（ABS）
輪胎：195/55R16MichelinPilotPrimacy
尺碼：4175×1695×1470mm
軸距：2600mm；車重：1160kg
平均耗油：13.0km/L
新車售價：$173,000
車輛提供：德記汽車（24404988）

■渾然一體嘅泵把連氣霸，別具一份霸氣。

■兩邊車身加有裙腳，給人有靠貼路面嘅穩妥性。

■尾泵把下附有整流配搭，滲透出房跑個性。

豐田Corolla車系深入民心，一直被視為家庭車嘅表表者；但若數到房跑車，大多數人卻會即時聯想到最新揭背版嘅CivicTypeR，以及其一台2.0公升i-VTEC新偈。無疑，後者主攻年輕及房跑車路線，自然更易得人受落，惟親身見過呢部CorollaRunx之後，你可會有截然兩樣嘅新體驗。

■全新Xenon頭燈及霧燈配搭，予人惡形惡相感。

■四輪16吋跑車合金胎軨，抓着力強又見收放自如。

■高置尾定翼連煞車燈，可謂跑意盎然。

頂級跑版樣子突出
皆因呢部Facelifted新版嘅CorollaRunx，屬頂級Aerotourer型號，有齊全車包圍、兩邊車身裙腳及尾定翼外，全新Xenon頭燈，匹配四輪加大碼16吋跑車合金胎軨，一副惡形惡相感可謂油然而生。

■後排可左右獨立收摺，令尾廂空間倍增。

車廂鋪排獨特設備齊
講到座艙陳設，前後兩排雙色絲絨椅，富朝氣又見乘坐貼服外，前排更屬仿桶形設計，予人更靠貼及十足承托力；再者，三幅式真皮跑車軚環，匹配上半皮半金屬波棍，既富質感又烘托出跑車辣味。
設備方面，除車門電窗、門邊電鏡及中央門鎖外，原車重備有恒溫冷氣及高級CD音響，加埋尾排可左右獨立收摺，還增添多一份實用性㗎！

■座艙鋪排講究又寬敞，還滲有一份房跑意識。

■簡潔清晰嘅液晶表板，勝在悅目易看。

引擎輸出強橫底盤了得
新車以一台VVTL-i嘅1.8公升直4DOHC偈作骨幹，另匹配上CloseRatio嘅6前速手波，引擎輸出平均之餘，超越5000rpm過後，轉數及扭力仍能持續攀升，似有用不完嘅氣力。
而針對入彎及過彎需要，一套看似平實不過嘅前輪麥花臣支柱，後輪扭力連桿組合，加上一個穩紮嘅底盤結構，循迹演繹既突出，又見抓着力強，難得吸震筒反應柔韌富支持力，可令車子有轎車巡航嘅舒適性㖭！

■前後兩排高級絲絨座椅，空間既闊落，而前排更屬高級仿桶形設計。

■鑲有雀目面板嘅中控台，有齊恒溫冷氣及高級CD音響。

■半皮半金屬配襯嘅6前速手波，轉檔利落又明確。

記者評語
全新版豐田CorollaRunx，外形變得獨特有個性，又見有房跑車辣味之餘，想唔到一部以傳統歐式懸掛結構，前輪柱式後輪扭力連桿配搭，會有如斯咬地及出眾循迹感；再者，一台1.8公升VVTL-i偈不僅每段扭力輸出平均，中、尾段更湧出一股爆炸力，可會是一部披着羊皮嘅辣車。