港股終於衝破13000點大關，高收13005，大升203點，成交又創今個升浪嘅新紀錄（唔計中銀香港（2388）披成嗰日），大增到269億元，動力好強，後市重有排玩。
成交咁勁，只得一個理由，就係新錢重好似倒水咁湧入嚟，呢啲錢，有海外資金，亦有大陸資金，來源雖唔同，但掃貨手法就一樣──絕不手軟。好似噚日，佢哋掃紅籌股，一郁手就掃幾球，等「些那」有番咁上下之時，又再掃過；除咗開市半個鐘頭震一震倉外，佢哋真係冇停過，一路買到收市。國企升咗咁多，紅籌點都會被帶起，基金家吓重係大手咁買，短期國企（大圍計）可能會唞一唞氣，輪到紅籌發力。
銀建國際（171）舞龍咁舞，短短6個交易日，股價就倍升，由1元升到2元，而且有成交支持，噚日就有1.12億股轉手，聽講有關人等重係咁買，目標價係在現水平再翻一番，即係4字頭。其實，𠵱家好多紅籌股股價着實大大偏低，因為今明兩年，盈利好大機會會以倍計增長，以PE十多倍計，好多紅籌股股價真係可以一個double。
新海康（119）消息亦係好勁，噚日高收1.64元，升10%。呢幾日，佢由1.2元起步，升幅只係36%，同銀建相比，仍屬大落後，消息話短線起碼會見到2字頭。下一個目標價，會係每股資產淨值的2.79元。
聽芬佬消息，新海康係短期內最有機會進行重組的中資公司，主席王軍有意做番場好戲，以大股東保利集團（持有66%）嘅實力，以及王軍嘅人脈關係，新海康「重新包裝」後，肯定可以成為紅籌股中另一顆巨星。
新海康主要經營航運、電力同地產，業務集中在內地，呢幾瓣，都好煞食。新海康家吓市值只係13億元，要壯大，股價上升係第一步，注資係第二步，分拆係第三步，相信大動作會陸續有來。
新世界發展（017）高成6.95元，已達上月中推介時的7元目標，消化一吓可再上。海油服務（2883）收3.025元，創新高，短線仍可以3.6元為目標。
郭兆誠