梅艷芳的母親日前曾表示會在愛女出殯後，公開多年積壓在心的恩怨，但昨日阿梅頭七時，梅媽已急不及待開火，怒斥治喪委員會決定火葬阿梅後才通知她，令她與阿梅將來一同土葬的希望成空，又指摘有人在阿梅生前阻撓她們母女來往，矛頭直指阿梅的經理人王敏慧。
梅艷芳日前因病逝世後，她一班好友組成治喪委員會，連日奔波為她安排身後事，但同時亦傳出許多是非風雨，先傳出阿梅生前的經理人王敏慧（Marianne）與草蜢及梅媽不和，其後梅媽更聲言會在阿梅出殯後，將多年積壓心中的恩怨全部公開。但昨日阿梅頭七，梅媽已忍不住開腔，表示從未聽過阿梅透露死後要火葬，梅媽又指希望將來能與女兒一同土葬，並直斥有人於阿梅生前阻撓她們母女來往，矛頭直指Marianne。
梅媽昨午離開其跑馬地寓所，到銅鑼灣與三名西裝筆挺的男士飲茶，席間梅媽不停說話，邊說邊拍枱兼手指指，表情憤慨，傾談約一個多小時後，梅媽離開銅鑼灣往上環，其工人一度下車買東西，之後梅媽便到彩虹邨劉家華區議員辦事處，說要派禮物給小朋友。
有記者問梅媽是否有意購買福地，待自己百年歸老後與阿梅一同土葬時，梅媽說：「成班人開咗會先話畀我聽火葬，佢哋話係佢嘅心願，咁人哋咁多把口，我得一把口，佢哋想咁做就咁做啦。都唔知佢（梅艷芳）幾時講過要火葬，佢識講嘢時唔聽佢有講，佢唔識講嘢亦冇見佢講。」據悉，多年前阿梅曾表示怕火葬，因怕被火燒。
問梅媽會否爭取為阿梅土葬？她說：「唔會，由得佢啦，成班人開咗會先同我講，吱吱喳喳，都唔知邊個打邊個。我想買福地，生時唔可以喺一齊，之後咪一齊囉。」問到有沒有東西給阿梅陪葬時，梅媽說：「我冇樣嘢啱佢，佢鍾意靚嘅。」至於阿梅會葬在何處，梅媽說：「唔知，我忍咗廿幾年，忍到爆，○四年我會爆嘢。」
問梅媽要「爆嘢」的內容是指阿梅還是其身邊人？她說：「喺佢身邊有好朋友同壞朋友，我積埋一次過爆，以前阿梅喺度阻到我，佢唔喺度就阻唔到，家姐出殯時阿梅唔畀我去，我知佢為我好，唔想我傷心，今期我講乜嘢都冇人阻到我，除非整死我啦！」問梅媽有誰意圖阻止她時？她說：「嗰個人心知肚明。」
再問到梅媽對Marianne的印象及二人相處如何時，她說：「唔知喎，面就見過，冇相處過，阿梅鍾意戴高帽，畀人落多兩句嘴頭就乜都聽你話。」問梅媽何時才知道阿梅病情惡化，她說：「阿梅過身一個星期前，做老母都唔知佢入院，通通電話截住晒我，一係話佢瞓咗覺，煮飯送湯叫人攞去就話放低，食唔食都唔知，從來都接唔到電話，唔講得嘢先畀我見，我講邊個佢自己知。」
梅媽續道：「有人話佢啲徒弟出嚟講嘢係二五仔，點先叫二五仔先？我睇報紙先知唔止我，連徒弟都講唔到電話呀，狠到不得了，唔知乜嘢居心，將來就會知。」梅媽說罷叮囑記者將其說話如實報道，然後又說：「唔好作嘢，唔係我媽到你暈。我唔係善男信女，我一出聲全港轟動，我要討回公道。」問梅媽聯絡到梅愛芳的兩名兒子沒有？她答：「搵唔到，有心自己會嚟。」
梅媽又說：「佢剛出道邊度搵幾百萬畀個大佬呃？租廣播道我幫佢簽契㗎，佢只係攞五十萬出嚟開狗場，我要同大仔討回公道。」梅媽謂阿梅兩位胞兄都有返港，阿梅的姪仔也有到醫院探望，惜阿梅已不能說話。
此外，梁漢文昨日出席無綫的宣傳活動時，表示對阿梅的身後事及頭七儀式全不知情，亦不知道可以去靈堂上香給阿梅，更表示是看電視見歐陽德勛往上香才知道可以去，問他十一日公祭會否去送阿梅最後一程，他說：「乜可以去嘅咩？如果可以去咁我一定會去。」
其實自阿梅公開患癌後，曾多次傳出其病情惡化，但她與Marianne都強烈否認，即使阿梅死前留院，Marianne亦否認有其事，到阿梅彌留當晚還聲言她病情穩定。對於梅媽的言論，Marianne昨日在電話中說：「我冇意見，係咪火葬嘅嘢，都係問番治喪委員會，問劉培基啦，我年紀最細，係smallpotato（小人物），你問啲有份量㗎啦，真係多事之秋呀。」
而治喪委員會昨晚於九龍塘繼續開會，記者向岑建勳提及梅媽不想愛女火葬及扯火一事時，他說：「陣間梅媽都會嚟開會。」但結果梅媽改變初衷，沒有往開會。岑建勳開會後表示，火葬是阿梅的意願，整個過程梅媽是知道的，當時她沒有反對。
至於劉培基則說：「體諒吓佢老人家啦。」蔡一傑昨日到靈堂上香則說：「乜都好，一切等梅姐出殯先，等佢安息啦。」
採訪：何永寧、卓美娟、林妙萍
攝影：陳慧安
