雖然韓國性感女星李孝利喺香港唔算好架勢，但話晒佢都係韓國頂級偶像，噚日我馮仁昭睇到韓國啲報章，話李孝利已經獲英皇邀請以十八億韓圜，即係約一千一百七十萬港紙，接拍兩部港產片，都咪話唔巴閉。
馮仁昭即刻向英皇求證，佢哋嘅藝人總監霍紋希證實，李孝利同佢同屬DSP事務所嘅藝人，決定簽英皇做佢哋喺韓國以外嘅全球經理人，而且重會好快喺香港拍戲同唱歌㖭。馮仁昭又聽講，李孝利其實係收咗一百萬美金（約七百八十萬港元）拍兩部戲，即係差唔多三百九十萬港紙拍一部。一部係同成龍合作，另一部會係徐克執導嘅《頭文字D》，即係到時會拍住周杰倫同陳冠希拍鍊車戲，勝在夠新鮮。
霍紋希重話聽日會有代表飛去漢城，同李孝利齊開記者會宣布詳情，之後先落實李孝利喺香港嘅處女作。
韓國報紙話係成龍睇好李孝利喺亞洲地區有所作為，所以通過韓國朋友同李孝利嘅經理人公司聯繫；亦有另一個版本話係李孝利舊年嚟香港做完「維港巨星匯」後，覺得喺香港好發展，咁啱同英皇一拍即合，至火速成事喎。
蕭亞軒最近喺台灣忙於宣傳新唱片，佢喺美國讀書嘅細佬新年放假，暫時做住佢助理先，蕭亞軒話佢畀細佬幾高人工，所以對佢嘅要求都好高，早幾日佢出席簽名會宣傳，就因為細佬整唔見咗佢嘅假睫毛而鬧咗佢一餐。馮仁昭覺得肅亞軒鬧佢細佬都只不過想教吓佢啫，唔係點畀佢知道世界難撈呀！
由加拿大中文電台主辦嘅「加拿大至Hit中文歌曲排行榜─03年度全國樂迷投票」已經有結果，最受歡迎嘅香港男女歌星分別由李克勤同容祖兒奪得，而最受歡迎國語男女歌手就由周杰倫同孫燕姿奪得，馮仁昭覺得今年對容祖兒嚟講係豐收年，唔單止喺香港攞到好多獎，𠵱家重威到去加國㖭，咁就證明佢努力無白費啦。
祥嫂今日會去八和會館大派利是，佢話粵劇係中國嘅國粹之一，自己因為受到祥哥嘅影響，十分欣賞粵劇，當年祥哥可以享譽粵劇界，有賴八和仝人嘅參與演出，佢希望八和會館可以繼續發揚粵劇嘅精粹，所以佢專程去八和會館派利是，象徵利是吉祥，事事順境喎。
