近日小初行街，經常聽到有人講股票，通常話題係抽到某某新股賺咗幾多錢，又或者係買咗某隻國企賺咗好多錢。小初聽到心驚驚，好似身處97年期間，咁多散戶上咗車，究竟係咪大市已經接近見頂呢？
經紀陳亦有同感，中資股只要求其有隻古仔流傳，再有人稍作推波助瀾，就必定有人跟炒。
前日小初提過，好多二三線股都諗住趁市旺，想在市場批股集資。小初噚日又聽到有一間公司想批股，就係近日話計劃大舉進軍網上遊戲嘅創業板股寶德科技（8236）。
經紀陳話，做開伺服器的寶德，突然染指網上遊戲生意，其實唔太難明，皆因呢個概念，現時廣為外國投資者接受，但在香港市場就似乎比較新。如果大家有留意新聞，就知道唔少細路鍾意通宵打機，有啲打到命都唔要，就知道呢門生意潛力有幾驚人。
寶德股價近排在0.60-0.70元之間徘徊，昨收0.67元，跌1仙。現時大市咁暢旺，如果有人肯幫手，要成功集資並唔難。
慕容小初