短線遊：
大埔社山村千年神木5層樓高

「神木」？有幾神呀？唔好誇大吹水喎，唔好求其整棵百年老榕就話係「神木」喎！講嘅係大埔社山村內一棵古樟樹，稱得上「神木」，當然有番咁上下料，古樟樹至少有1,000歲、差不多5層樓高，老村民當佢係寶，本地旅遊界封佢為「香港十大名樹」之一，咁出名，當然要見識見識。

記者：陳震霖　攝影：陳智良（部份資料由友晟出版社提供）
模特兒：Emily（SunSpot）、Cherrie

「神木」中通5呎大窿
起初以為「神木」好難搵，好彩社山村有路牌指示方向，原來離村口不過10分鐘步程，Emily同Cherrie一見「神木」，擘大個口得個窿：「嘩！大得好誇張！」難怪佢哋如此表情，事關「神木」接近16米高，要7個姚明騎膊馬先摸到樹頂，樹幹勁粗壯，至少8個成年人先可以完全環抱，根部有個5呎高大窿，企迫啲，可以一次過容納5人，據村中老婆婆講，古樟樹至少有1,000歲，本地旅遊界更封佢為「香港十大名樹」之一。

「大菴古道」崎嶇難行
參觀完「神木」，決定一探百年古村大菴村，原定路線先經白田崗，入龍丫排再取「大菴古道」入大菴。沿途無路牌指示，路在口邊惟有問村民，30分鐘兜兜轉轉，面前一排荒廢古屋，現今人去樓空，頹垣敗瓦，只剩前幅牆身屹立不倒，穿過古屋群，踏破鐵鞋無覓處，「大菴古道」就喺眼前。
不過Emily同Cherrie興奮得太早，古道雜草長及膝，三步實地兩步踏空，有幾步重差啲拗柴，再行10分鐘，唔對路，古道愈來愈唔明顯，加上沿途金塔星羅棋布，膽小美少女愈行愈心驚，為免騷擾先人，折返為上，改由林錦公路入大菴村穩陣得多。

卜卜齋學堂六德書室
出番林錦公路，見到陳森記士多，直入就係大菴村，村內嘅六德書室最值一遊，書室比其他村屋高一截，頂頂個牌匾勁有中國懷舊Feel，一睇就知係卜卜齋學堂，實際建成年份舊到連當地村民都唔清楚，只知道書室已經荒廢40幾年。
書室隔籬係張氏宗祠，係以前村民祭祖聚會嘅地方，等於𠵱家嘅ClubHouse，只有當地村民先入得，Emily同Cherrie以身犯禁，跨過門檻準備影相嗰陣，突然有把男聲問：「邊個？」眾人當堂嚇窒，小記連場向空氣道歉，點知一望……四周無人，把男聲又響起：「邊個？」日光日白無咁邪啩？終於發現原來係隔籬屋隻多嘴烏鴉作怪，嚇死人咩！

林村許願樹拋牒
未玩夠，順便去林村許埋願至走，林村有2棵許願樹，大嘅一棵係樟樹，年代久遠，樹幹枯萎，最後變為通心樹，求家宅、事業、健康最靈，細嗰棵求姻緣，大家唔好搞錯。許願有程序，先喺樹下上香，再買份「貴人寶牒」，在上寫上願望，老土講句，想靈嘅就唔該寫嗰陣認真啲，寫完就拋上樹，掛到上樹就願望成真。
賣寶牒嘅婆婆教埋拋牒竅門，先將繩綑實寶牒，揀條矮啲嘅樹枝，瞄準拋上去，半空中，由於橙重過寶牒，繩就自自然然鬆開，一條完美嘅拋物線，寶牒就可以掛上樹，聽就易，要拋中都有難度㗎。

補給站
睇完「神木」，又行古道，大大話話都行咗兩三個鐘，入大菴村之前，不妨去陳森記士多攤唞吓，飲罐汽水，同老闆吹吓水，先至再起行喇。

陳森記士多
地址：林錦公路與大菴村村口交界

交通行程
1.觀「神木」：大埔墟火車站乘64K巴士（$6.9）往林錦公路社山村站下車。
2.走「大菴古道」：折返林錦公路，步行20分鐘經龍丫排訪古道。
3.訪大菴村：折返林錦公路，步行15分鐘，見陳森記士多直入
4.許願樹許願：折返林錦公路，乘64K巴士在放馬莆站下車。