廣州出現第2單沙士疑症及內地證券商出事，個市當冇到，恒指又再升203點，紅籌指數升幅更加大過恒指。
樓市轉旺，地產股發威，結果頭20件龍虎輪，有17件係地產Call輪，升幅最少嗰件都有37%，全部都係長實（001）、新地（016）同恒地（012）嘅衍生工具。
恒指破萬三，地產股領風騷，但啲地產Call輪升得咁速，買落去，贏錢嘅話叫做富貴險中求，輸錢嘅話叫做衝動過頭，叫做貪勝不知輸。如果真係想追貨，所揀嘅地產Call輪最好溢價咪太高嗰類，寧可爆炸力冇咁大，但相對風險細好多。
講起風險，電盈（008）今個升浪佢冇乜份，去年恒指升35%，電盈跌15%，跑包尾，風險將相對低好多。個市若然再升，佢可以有炒落後可能，個市若回頭，佢則因為冇升過而唔怕大散。
電盈企定5.25元，主角標準Call輪9791收97仙，升4仙，兩個幾月後到期，溢價4.2%，槓桿率5.4倍。炒電盈Call輪，正路揀呢件，想玩特種輪，則可揀9762，呢件係鎖定回報輪，玩法同標準輪唔同，不過正股如果郁，佢一樣會跟住郁，明年10月到期，勝在交投旺，輪價42仙，按發行商網頁提供數據，溢價15%，有效槓桿率3.9倍，可作參考。
章盛