剛於美國底特律舉行嘅北美國際車展2004，場內展出咗多款惹人注目嘅概念車，其中尤以福特Bronco至為矚目；不如𠵱家一齊嚟先睹為快，睇吓部份在場展出嘅概念車啦！
若要數今屆車展會場內，最惹人注目嘅概念車，相信非走SUV路線嘅福特Bronco莫屬；以方匣子造型示人嘅Bronco，不但予人一份四驅SUV應有嘅剛強個性，響一套18吋六幅式胎軨，及以銀色為主調嘅車身顏色襯托下，更顯現出一份誘人魅力。
然而，呢款Bronco概念車嘅車廂同樣來得突出吸引之餘，佢所配用嘅嗰台2.0公升DuratorqTDCi柴油Turbo引擎，馬力輸出數值高達130ps/4000rpm，而其33.7kgm扭力峯值，更當引擎處於1800rpm時發出㖭！另外，廠方更為其加裝氮氣加速系統，以應付突如其來嘅需要；而一套出色嘅四驅系統，以及四輪18吋全天候輪胎組合，亦能令車子有更出色嘅行車表現。
越野路華車廠繼推出全新RangeRover後，佢哋又響今屆車展會場上，展出一款名為RangeStormer嘅概念車，並惹來不少車迷注視。
呢款RangeStormer概念車以雙門SUV形象示人，襯以全新設計嘅車首造型、22吋闊大跑車胎軨，以及向上開嘅跑車式車門配搭，賣相可謂既吸引又突出。車廂布局亦見有一份吸引性，皆因除空間寬敞乘坐舒適之餘，天幕式車頂設計，更能給予乘客有親近大自然嘅機會。
機械配搭方面，則會以一台輸出強勁嘅V8Supercharged引擎，匹配一套6前速自動波箱，性能表現毋庸置疑；另外，當然唔少得重有多套先進電子系統，如DynamicStabilityControl及HillDescentControl等等，從而令行車變得更安全啦！
