賓架Y講澳門為吸引外商，特別免徵任何利得稅，目的係（一）製造本地就業，外商到澳門設立公司，每間點都會請番十個八個夥計；（二）減低寫字樓空置率，電費水費都收多啲。呢招已經初見成效，令到好多香港廠商將寫字樓搬過去（特別係工廠設在珠江西岸者）。賓架Y話：「我哋有十幾個呢類客戶，已全部搬咗去澳門，只有客戶嘅老闆，仍人在香港。其他中型企業客戶，亦都研究好唔好搬去澳門。港府話物流、貿易服務、旅遊、金融係香港四大支柱，照我睇，前兩項好易俾澳門挖空。起埋條橋，由澳門去赤鱲角機場，快過由將軍澳去，問你點辦！」
怎麼辦？阿拉弗懂，董先生、唐司長都係江浙人，大概懂啩。賓架Y叫左丁山不妨去澳門買樓自住退休，生活費平好多之餘，兼可有香港澳門生活情趣，好似有得諗噃。當今世界，工作職位如河水，高向低流，美國啲IT職位，不斷流向印度，美國啲基金公司，不斷將初級分析師、電腦人員開除，喺印度請過；咁樣，香港嘅貿易服務職位，流過大海去澳門，一啲都唔奇。民主黨嘅經濟發言人要清醒啲，李卓人要睇吓環境，成日叫政府加稅，反效果好嚴重㗎。設立最低工資更會死快啲。民主黨爭取民主，我哋舉腳贊成，但如果唔贊成削減政府開支，反而叫政府加稅滅赤，乃死路一條。