由《車主》雜誌主辦、歐米茄協辦嘅第14屆「全港最佳汽車選舉」頒獎典禮，已於昨晚假香港仔深灣遊艇會順利舉行，而23個獎項亦經已揭盅；其中最矚目嘅「2003年全港最佳汽車」金、銀及銅獎，分別由寶馬5系（見下圖）、奧迪A8及日產Cefiro奪得。另外，當晚更可謂星光熠熠，皆因不少城中名人車手，如馬清揚、方中信、李英健及MatthewMarsh等等皆有出席，並擔任頒獎嘉賓，場面十分熱鬧。
而今次「全港最佳汽車選舉」，早於去年12月開始接受讀者及公眾投票，其中讀者及公眾選票佔總分嘅80%，而《車主》雜誌編輯部則佔總分嘅20%，有關方面更委託中大香港亞太研究所負責點票、核實及分析，可謂既公平又公正，所有得獎汽車絕對稱得上實至名歸。
