港股今年第二個交易日，恒指進一步升破13000大關，收報13005，升203點，成交269億元。國企股雖見個別回軟，但資金改追捧落後地產股、和黃（013）及國內電訊股，相信唔使幾耐就輪到電訊盈科（008），現時大市資金充裕，要推高電盈一兩成絕對唔難。
中國人壽（2628）今日正式加入大摩指數，基金調整投資組合之行動亦告一段落。恒指服務公司料會在短期內宣布調整國企指數成份股，相信會將國壽加入成份股之內，不過這已是意料中事，相信不會對國壽有太大刺激作用，反而國壽的加入，會導致中石化（386）及中石油（857）在成份股內所佔的比重調低，兩股或因此而受壓。
素來只有火燒旺地，今次竟然玩到火燒地鐵（066），幸好今次事件冇人死亡，雖然當局認為不是恐怖襲擊，不過事件非常恐怖，揀正繁忙時間兼在地鐵過緊海（行車時間較長）時動手，兇徒居心叵測，今次冇人死只係好彩而已，如果再有多一次類似事件發生，都咪話唔大鑊。地鐵股價噚日冇起跌（唔知係咪嚇到唔識跌），收報10.40元。
廣益（530）自從獲郭應良包銷供股，入股14.13％後，股價一直向上攀升，噚日更勁升30%至2.6仙，比起供股價1仙，有1.6倍升幅，不過成交只得1073萬元，要全身而退相信好難。黑客話，聽講有人睇見市旺，想買番隻殼玩吓，並唔係諗住出貨獲利。
阿虎