踏入新一年，由於農曆新年將至，唔少汽車代理商，都急不及待推出新車款，除有多款日本新車外，另一邊廂嘅法國標致，響新代理商接手後，頭炮會係唔少車迷期待已久嘅全新206GTi（馬力180匹），惟響新人事新作風下，新車未必以薄利多銷為大前提，加上近期歐元狂升，或許新車價會響18萬元左右落筆都唔定。
轉過頭看另一邊廂嘅德國車，奧迪代理經已火速運嚟新版A41.8TS-line特別版，唔單止全車加有Aerodynamic包圍，最重要係一台1.8公升Turbo偈，響廠方換裝電腦晶片、K4渦輪增壓器，及加置雙Intercooler後，馬力由原來163匹急升至191匹咁多，兼且重換裝有16吋頭輪制動碟，還有經原廠QuattroGmbH特別調校、下降20mm嘅Racing避震喎！單睇一副惡形惡相嘅造型，絕對媲美同級寶馬3系同平治C-Class㗎！
據知，呢款A41.8TS-line特別版，遲吓重會有五門Avant型號，以及終極辣版，配有恒式四驅Quattro系統、6前速Close-ratio手波嘅A41.8TQuattro型號㖭！若然你係奧迪Fans的話，就真係要留意我哋遲吓嘅報道喇！