阿董嘅施政報告近在眼前，星期三就公布，不過睇嚟全港都冇咩期望，各界反而紛紛訪問三月先出財政預算案嘅財爺唐英年，因為知道內容肯定實際啲。有人話，元旦大遊行有咁多人上街，董生點都要喺施政報告回應吓民意，所以施政報告點會完全冇嘢？
施政報告有冇料到，上個星期二晚係十二月三十日，阿董去咗中環欣賞皇后像廣場嘅聖誕樹燈飾，佢重原定會喺聖誕鈴許願廊許願。其實過咗聖誕先睇聖誕燈飾已經好古怪，當日在場記者多次高聲問董生，有咩新年願望，董生都好似聾聾哋。
最後曲終人散，記者返到報館趕緊稿之際，先收到政府新聞官嘅電話，話你哋之前係咪問過董生新年願望，𠵱家可以話畀大家知，係「百業騰飛 安定繁榮」。吓，咁殘舊嘅行貨語句，都要隔幾個鐘先至有公布？董生諗八個字都慢過人，點可能元旦遊行七日後，董生嚟得切反應？
（圖）阿董去得許願廊都冇諗定許咩願。
傳真︰2623-9278
電郵︰