一月一號到馬場進貢，碰到沙田稀客賓架Y，問佢點解突然咁有興趣到馬場，佢話：「一位同事話佢隻馬好有希望贏，叫我入場幫手拉頭馬。」咁堅嘅貼士，唔跟吓點得呀，但碰啱係第二場，自己有隻心水馬，就係立法會秘書馮載祥隻「哈哈霸」，咁點好呢？最後決定係買單Q單位置Q，唉，賓架Y隻「好料」，名落孫山，「哈哈霸」就贏咗，馮載祥哈哈笑咁拉頭馬，左丁山就笑唔出咯。
元旦日馬場唔見太熱鬧，賓架Y話：「自由行益唔到馬場，益咗澳門，燊哥賺到笑，交成百億銀稅，所以鏵哥可以減稅。𠵱家澳門漸漸成為貿易中心，遲啲成為金融中心都有可能！」
唔係呀，香港點都好啲啩？賓架Y話：「鏵哥自從宣佈澳門免offshoretax（離岸稅）之後，起碼已經有二、三百家香港公司、工廠，將啲L/C、貿易業務轉咗去澳門，問我啲銀行借錢、攞額度，指定要由澳門分行借畀佢哋嘅澳門公司，顧客永遠是對的，故此我哋擴充澳門分行，加強押滙部，派一啲老經驗行員過去做，請咗一批澳門人幫手，睇怕遲早間公司都會搬過去澳門㖭，因為如果工廠設在中山、珠海，做單、收錢，辦公室放喺澳門，貨櫃由蛇口碼頭處理，完全免稅，十分方便。港珠澳大橋起好之後，香港就知死。阿松去年一聲加稅，廠商群起鬆人，今年睇怕亨利哥唔敢加稅喇啩。」