政府即將公布勾地表計劃，相信各大地產商都已經計緊數，研究邊幅地皮有發展潛力，而小市民最關心嘅，始終係對樓價嘅影響，勾地啲咁複雜嘅問題，就留番畀發展商慢慢諗。
噚日蘭西就問過幾名睇樓客嘅意見，其中諗住買兩個將軍澳蔚藍灣畔單位嘅黃先生就覺得，恢復勾地對樓市嘅影響有幾大，𠵱家真係唔知，不過就有信心會有好嘅影響，佢重話樓市氣氛轉好，所以買樓投資可保值，好過放喺銀行收低息。
另外一位住喺將軍澳嘅蘇先生就有啲擔心，驚恢復勾地之後，樓價會有波動，但係佢睇今年嘅樓價走勢都可以平穩發展，考慮換樓。至於梁先生就覺得，恢復勾地對樓價應該無乜影響，佢話𠵱家樓市氣氛都未算好轉，恢復勾地亦唔代表樓市復甦，對於佢入市與否影響唔大。
地鐵為公益金籌款，噚日喺九龍灣德福商場開幕，請咗粵劇名伶蓋鳴暉做嘉賓，佢喺台上唔單止落力呼籲市民多多消費兼做善事，重以身作則率先捐出一千蚊，台下成班蓋鳴暉歌迷一呼百應，不甘後人塞錢入捐款箱，其中兩名媽咪級歌迷，每人用咗一百蚊買名伶手上原價二十蚊嘅風車，開心到好似中咗六合彩頭獎咁，笑到見牙唔見眼，瘋狂程度同時下嘅年輕樂迷不遑多讓，名人紅星嘅號召力果然強勁，蓋鳴暉都好識做，清唱一曲答謝fans。
豪宅愈貴愈當旺，中原吳文忠話，南區二線豪宅例如壽臣山同舂坎角一帶，成交量連續4個月落後畀一線嘅淺水灣豪宅。
不過，隨着一線豪宅買少見少，購買力陸續轉移至二線優質盤，成交宗數慢慢追貼一線盤，一線同二線豪宅成交量由9月份嘅21宗比2宗，拉近到12月份8宗比6宗，追得快之餘，個價都升得好急。以舂坎角豪宅為例，9月份平均呎價4500蚊，到12月升到每呎5200蚊，升幅16%，相對同期嘅淺水灣豪宅，升幅只不過一成左右。
舊年樓市先苦後甜，發展商賣樓成績理想，市場預期今年會更上層樓，照咁睇發展商04年賣樓應該重輕鬆，冇乜壓力，但蘭西同啲發展商傾開，實情唔係想像中咁樂觀。
大部份發展商都認同，今年樓市會好過舊年，所以斷估都唔會有減價戰，佢哋反而擔心同行過度樂觀，推盤時唔生性瘋狂加價，嚇親買家，令市況即時冷卻，到時要再搵人買樓就艱難嘞。
據講有可能大幅加價嘅發展商有幾間咁多，唔怪得就算樓市好番，發展商重係眉頭深鎖啦！
美聯物業集團顧問黃錦康講，集團因屬上司公司，可以善加利用這方面嘅優勢。佢透露，集團在會見基金經理時，會聽取對方意見，擴闊公司視野，甚至可以借用部份意見加以發揮，所以能及早講出樓市轉勢的訊號。佢重透露，舊年曾有個別基金經理曾查詢為何美聯不開一百間分行，一言驚醒，所以集團決定未來一年會大事擴張。
佢話地產走勢最先係舖位買賣大熱，跟住就到豪宅，之後就係新界嘅屋仔，各位有意買樓自住或投資要留意嘞。
蘭西
電郵地址：
