踏入二○○四年，大使第一次同讀者喺呢度見面，雖然遲就遲咗啲，不過都要講一聲：新年快樂！希望人人喺○四年「零舍」開心，同埋最緊要身體健康。
唔知係咪經濟氣氛好咗，呢個聖誕同新年特別有氣氛，搞到原本視錢財如命根嘅大使，都大破慳囊花咗一筆四位數字嘅錢去買禮物送畀至愛親朋，見到佢哋開心個樣，大使再一次體會到施比受更有福嘅道理。
再過兩個多禮拜就係農曆年啦，踏入猴年，大使希望香港真係好似馬騮仔咁紮紮跳，充滿生機。對於有經濟能力嘅人嚟講，一千幾百蚊嘅利是錢只係一筆新年小財，可以畀佢哋用嚟買吓一啲唔等使嘅嘢，不過，對於貧困家庭，收到一封二十蚊嘅利是，可能已經夠佢哋買餸煮餐飯食。
大使喺度呼籲一啲「單身貴族」，同埋活喺幸福之中嘅小朋友，唔好吝嗇你哋嘅愛心，將部份嘅利是錢捐出嚟做善事，令呢個農曆年過得更有意義。當然，如果你選擇捐畀蘋果基金，大使一定會「借花敬佛」，去幫一啲真正有需要嘅人。
暖流熱線
電話：29908688
傳真：23702192
電郵：
網址：