上星期寫過一人黨黃英琦如果想做灣仔區議會主席，要過民主派一關，點知黃英琦話，佢喺參選政綱寫得好清楚支持○七年直選行政長官，○八年立法會全部直選，所以冇同民主派立場不同嘅問題。
佢話想競逐主席係因為灣仔區議會咁耐都係由林貝聿嘉領導，今次希望有突破，為地區發展做吓嘢。既然係同路中人，白鴿黨黨中央達仔話由得佢哋七個民主派人士坐埋傾，做民主決定囉。
達仔講就易，八方聽聞喺投票前夕重未傾掂數，因為民主黨嘅謝永齡都有興趣做。有位灣仔街坊重email向八方告密，形容「某民主派二流大學教授想爭做主席，不惜同隱形保皇黨私下勾結，分做正副主席」云云。當中主角呼之欲出，達仔就猛話唔會啩，八方亦覺得中聯辦都唔會批准。
總之就有好戲睇，一個十四人嘅區議會，分分鐘有三個人包括吳錦津爭做主席，都好刺激啫。
傳真︰2623-9278
電郵︰