劉德華同杜琪峰合作拍完《大隻佬》，最近寰亞老闆林建岳又拉攏佢兩個合作拍一部《大力士》，女主角就搵嚟老拍檔鄭秀文（Sammi）。之前阿杜拍《瘦身男女》已經將勁fit嘅華仔同Sammi變肥仔、肥妹，今次玩大力士，當然難唔到華仔，不過大家唔好聽個片名就以為華仔又要做筋肉人，其實呢部係一部龍鳳鬥智片，風格有啲似《暗戰》。
寰亞同阿杜簽咗兩部片約，佢呢個月中會先開拍一部由任賢齊、陳慧琳同張家輝主演嘅新片《大件事》，同期阿杜又可能要同中國星開拍《柔道龍虎榜》，由古天樂同郭富城主演，到三月先會再同寰亞拍《大力士》，阿杜今年啲戲開得咁密，真係一線紅星都唔夠佢忙呀！
車淑梅早前隨香港世界宣明會去咗泰國北部探訪，當地係亞洲愛滋病感染率第二高嘅國家。車淑梅重首次接觸受愛滋病影響嘅家庭，佢話：「睇到呢個世紀絕症對兒童造成嘅遺害，我覺得好震驚。我探過一個只有十歲嘅愛滋病女童，佢瘦到剩番三十幾磅，真係好可憐。」
陳淑蘭噚日同緋聞男友曾國銘，拖住一大一小嘅金毛尋回犬一齊出席喺山頂搞嘅狗展活動，蘭子隻金毛尋回犬不停咁吠，嘈喧巴閉，蘭子話可能隻狗見到有咁多人，所以零舍活潑，佢重讚隻狗好叻，曾經拍過劉德華MV，識得搵錢。連亂吠都可以當活潑，蘭子真係錫佢隻狗啦！
黃日華出名係好好先生，早排佢同施念慈一齊返內地拍有線嘅《靈異偵輯檔案II》，有場戲施念慈要吊威吔，華仔已經拍完自己嘅戲份都留喺現場，重企定喺施念慈要停嘅位置等佢，喺佢差啲撞埋牆時及時將佢接住，所以施念慈同朋友提起黃日華都讚不絕口。
名模蔣怡前晚喺灣仔會展出席電影《我的大嚿父母》首映，佢同男朋友拍拖到場，重扮到鬼咁靚女。蔣怡拍緊成龍部《新警察故事》都差唔多埋尾，趕及農曆新年休息，佢話：「我做完工作，農曆新年會同男友去新西蘭度假，過一個暖笠笠嘅新年。」咦！咁咪可以着吓比堅尼兼游吓水！
