碧咸、施丹齊「掛彩」<br>球驗客手記:皇馬新年唔多老嚟

碧咸、施丹齊「掛彩」
球驗客手記:皇馬新年唔多老嚟

皇馬日前險勝梅西亞,算係喺新年攞番個頭彩,但隊中兩條A碧咸同施丹就有傷有病,希望唔好係壞兆頭就好嘞!
碧咸呢場波踢得麻麻哋,上半場浪費咗一個黃金機會,最後重因為俾對方後衞卡維路攔截後足踝受傷;啲血滲到隻襪紅晒,要由古迪入替,希望佢冇乜大礙就好啦!
至於施丹就重慘,賽後至知佢冷親有啲發燒,而且開波初段就俾人刮親隻眼同個頭,搞到有段時間甩甩漏漏,真係唔怪得佢;難得嘅係佢亦都有幾球好有功架;不過佢終於頂唔順,下半場冇踢,隊波之後就係咁俾梅西亞揼。
由此可見,如果皇馬少咗呢啲A級球員,攻力真係打折扣。新年伊始,皇馬似乎唔多老嚟,係佢哋球迷嘅,不如求神拜佛幫幫佢哋好喎。

梅度「性戰」?
打還打咪累球迷
效力車路士嘅羅馬尼亞前鋒梅度,日前佢嘅前度女友同英國傳媒爆同梅度嘅「性戰」,喺間餐廳嘅女廁內鬼混。好多英超球星生活都好混帳,我求大俠收到呢單料時一啲都唔覺出奇,只係希望梅度千祈咪喺賽前搞咁多嘢,若搞到腳軟連累捧車仔場嘅球迷,咁就唔好啦!

簡路迪人紅
柏列特醒目就收聲
早前熱刺領隊柏列特不忿隊中射手簡路迪,寧揀代表馬里踢非洲國家盃都唔幫手護級,重傳出未來賽事棄用佢!點知前晚足總盃簡路迪即刻入三粒,幫球隊贏波晉級;我睇柏列特你都係低調啲好,𠵱家熱刺咁嘅環境,簡路迪睇怕把聲都大啲啦,話晒係隊中王牌喎!

米拿「踩」唔足
畀面派對也甩底
香港難得喺市區搞單車賽,又請埋喺香港大嘅「環法」分站冠軍英國米拿,緊係要去睇吓。佢真人都幾有台型,我求大俠就部喺終點諗住為佢歡呼吓,點知佢踩咗二十四個圈就突然棄權。但攞得人家戲金就應該踩畢全場嘛,𠳔重連餞別酒會都無到,無禮兼無體育精神啲喎?!

布朗玩到盡
球證錯逐唔肯返歸
NBA活塞隊教練布朗喺噚日贏勇士場波,被球證錯誤以為佢犯咗兩次技術犯規,重罰咗佢出場,之後球證知道自己判錯咗,立即判布朗可以入返嚟;點知布朗唔知係咪以行動抗議或抑知道活塞贏硬,居然唔肯返回球會繼續教路,將個波交波交畀助教,重人都走埋㖭。咁都得?