港股呢排炒風雖然熾熱好多，但小初同一班經紀朋友傾過，發覺全世界嘅注意力，都係放在新股同國企，二三線細價股的炒風，未真正出現。
經紀陳話，如果散戶炒新股同國企賺到錢，遲早都會轉炒二三線股，其實唔少炒家已經摩拳擦掌，準備隨時出擊。
聽講好幾隻想開車炒作的股份，不約而同都係玩生物科技呢個概念。由舊年年底炒到𠵱家嘅創富生物科技（340），傳聞會在短期內有注資行動。
其實小初早在3個月前，都聽過類似消息，不過只聞樓梯響，不見人下來。但隻股最近由0.40元水平，一條氣炒上最高0.61元，上周五收0.55元，跌0.02元，睇走勢唔似係乾炒，應該有動作跟尾。
另外，早兩個月炒過醫療概念的上海銘源（233），近來股價一直在0.60元水平橫行，上周五收0.62元，升0.01元。經紀陳話，市場傳聞隻股有意在短期內配股集資，估計係想抽水在大陸搞醫院等醫療生意。
慕容小初