一年一度嘅所謂「施政報告」，醜媳婦終須見家翁，星期三就要公布，據所謂「中央政策組」頭目劉兆佳口窒窒咁透露，原來到𠵱家重喺度慢慢「鬥」緊，即是話個醜媳婦重喺度最後衝線，搽脂補粉。
劉兆佳又話，所謂施政報告，政府會在「能力範圍」之內盡量做到最好。吓？政府嘅「能力範圍」，過去七年，已經證明有幾大面積，聽漏口佳咁講，呢份所謂施政報告，毫無例外，又係賣豬肉灌水嘅假大空粗製濫造劣作。
可憐阿董刻意模仿殖民地時代港督，係都要學人哋咁一年出嚟表演一次心口碎大石，生吞滾油。可惜，人哋港督嘅表演，水準高超，令人懷念到今日，而阿董嗰幾手大笪地三腳貓貨色，就一年不如一年，搞到傷痕纍纍，失手夾穿崩，今年重要懶醒將「施政報告」提早至新年後。全港市民，啱啱開開心心過完一個聖誕新年假，估唔到過兩日打開個電視機，又會見到嗰一副肥頭耷耳、眼袋加豬頸肉口窒窒講嘢嘅尊容，真係新年當頭第一鑊衰運。
昨日又有人操上政府總部示威，要求阿董關注多啲就業問題，話應該成立番一個「經濟就業委員會」，又試跨部門研究吓。冇嘢做到，設立委員會，確實係阿董所長。七年以來，新成立咗幾十個空殼委員會，一味派空職、分銜頭，一事無成，又叫阿董開多個委員會，唔好啦啩？
對於阿董呢個人，由於全港哀莫大於心死，董記施政報告，港人已全無期望，到時亦無所謂失望。阿董噏乜，香港已經冇人有興趣，反為對於梅艷芳出殯嗰日，主祭嘅張敏儀屆時朗讀嘅悼詞有乜內容，更加關注。至於阿董又想成立幾多個乜叉空殼委員會，委任多幾多個人嚟通屎渠、髹公廁，香港人更加唔想知，反為幾想知道吓點解梅艷芳嗰個治喪委員會，又有幾個熟口熟面但係又好似唔係咁關佢事嘅人名，同埋梅媽嘅權力有冇受到架空，對於個女火葬定土葬，有冇話事權？
都係賭王何鴻燊最講得出港人嘅心聲：阿董好信唔信，信咗赤鬚軍師，搞出一鑊「八萬五」，矛頭直指梁振英。何博士又話，呢個人係窮家出身，所以仇恨富人，佢若果做第三屆特首，自己一定抽銀根走，返回澳門。
想當年，「八萬五」就係大張旗鼓咁寫喺阿董嘅施政報告嘞，收尾就變咗「唔存在」喎。所以「施政報告」價值不如一卷國產嘅廁紙，呢頭公布，嗰頭可以沖得入排污渠，再輸往南中國海。
阿梅一世人俾好多人呃過，不過佢去得早，起碼佢冇眼再睇阿董再讀乜叉「施政報告」，老襯永遠都有，「施政報告」再次充滿偉大遠景，北京中央嘅胡溫，就焗住要再俾阿董呃多一次嘞！
傳真︰2623-9278
電郵︰