韓國嘅瘋狂愛情喜劇，就好似鄭秀文、楊千嬅式個啲小品，真係長拍長有，但大家熟識嘅車太鉉近排連續兩片失利，啲導演即刻轉軚搵咗同佢一樣咁得韓國少女歡心嘅金在元，配有福將之稱嘅河知雲，拍咗套《為我的愛勇往直前》。
套戲雖然月中先上，但我羅拉聽聞唔少韓國高中生都話呢套唔睇冇話題，因為河知雲呢輪紅透半邊天，差啲贏埋李英愛做最受歡迎韓劇女主角，而且佢鬼片、古裝同搞笑劇樣樣收得，觀眾話由二十四歲嘅佢扮高中生，肯定夠搞鬼。
至於做開陽光小子嘅金在元，首次扮演任性太子爺，大把靚女想巴結佢，偏偏佢就睇上眼尾都唔望佢一眼嘅河知雲，重夠膽光天化日喺校門抬走人，只係因為要佢做啲雞毛蒜皮嘅事。為咗套戲，最近河知雲不停為雜誌做宣傳，就算之前去到瑞士滑雪，都不忘狂影靚相博見報，真係辛苦晒。