1.Oldschool潮流會由七十年代跳至九十年代，AirMax95、FoampositeMax和AirForceMax新色令你對腳冇咁悶！
2.球鞋網站會再次進入冰河時期，某大網站隨時拜拜；原因？當然係因為「莫財」啦。
3.黑/粉藍和紅/金色系抬頭。佐敦牌力谷黑/北卡色，AJXII、18.5；甚至ProQuick都一窩蜂響應，隨時成為新一年至「熱」色系。至於紅/金，一個原因：占士大帝大晒！
4太多無厘頭的crossover波鞋，間接令呢股風潮加速死亡；當你又出乜乜crossover，佢又有物物crossover的時候，太濫交只會一齊死！
5.球鞋DIY玩完。三十六對又三十六對，所謂「藝術家限量版」變成印銀紙咁出法，對唔住，你唔配叫藝術家，只係油漆工人。
6.更多NBA球員奉行「冇贊助波鞋」主義。其實係各大品牌都不願意巨額贊助啲「球星」，球星又唔肯割價簽約，變成「雙輸」局面！
3月要準備「飲鞋」
7.香港繼續排隊、繼續炒鞋、繼續行貨變水貨，各大品牌都愛莫能助。零售商做賊喊捉賊，扣起所謂行貨來買；最慘係消費者，又要畀錢人賺，重要瞓街輪候，天理何在？
8.佐敦牌各復刻版比AJXIX更好賣，AirJordanSB（SkateBoard、滑板）舉世震驚；直情係太空也入樽，佐敦也踩板!
9.新鞋款無論點正都冇人買，因為雜誌話日本仔唔「buy」；各大潮流雜誌由「介紹」變成「引導」，可惜雜誌立場只係抄外國消息，難得各大「潮人」仍拿住當「先知」，真悲哀！
10.三月香港波鞋界有怪事發生，請準備你對「飲鞋」。
各位敬請剪存本篇，喺今年十二月三十一日睇吓有幾多樣應驗，到時至拆我招牌都未遲！
Hleung──波鞋網站
Email: