大行出報告，多看好後市，恒指今年的上升目標，最保守都睇14000點，樂觀嘅就超過15000點，以指數計，升幅約20%，但個別股票升幅肯定更大。
今年首季，國企同紅籌股仍係投資主流，雖然佢哋已累積了好大升幅，但在現水平起計，再升多幾成的機會仍大。至於二三線股，由於落後大市頗多，下一個浪應該輪到個別有實力及偏低的，升幅更會以倍計。東強電子（615）、彩星集團（635）、金威（910）等近期表現較弱，可趁低收集；佑威（627）、永成化工（850）、滙漢（214）、遠展（035）同宜進利（304）等則轉強，短線值博率高。
近期上市而熱炒的新股，中國人壽（2628）、人保財險（2328）同紫金礦業（2899）的升勢都不相伯仲，由於國壽同人保好快會列入國企指數成份股，市場已預計呢兩隻保險股重會有排升。至於紫金，據來自極可靠的中資消息，話大戶已經上晒手，未來升幅可能更勁。
紫金發售3.48億股H股上市，定價3.3元，上市首日，成交已逾4億股，股價則由4.7元一路掃到5.95元（收5.7元），除咗大戶及極少數有心揸長線嘅投資者外，大部份貨源在當日已轉手，其後的4個半交易日，成交合共3.65億股，貨源應已明顯歸晒邊。上周五，成交縮到4064萬股，係上市以來最低水平（不計大除夕的半日市），整固應已接近完成，另一個大升浪，好快就會展開。
大戶點解咁鍾情紫金，主要係內地嘅金礦股，PE由40倍至60倍，而紫金上市PE只係11.75倍，而即使升到6.25元，PE重係講緊22.2倍，同內地同業重有一大段距離，就算以30倍計，股價已可見8.4元，以40倍計，更可見11.2元。
紫金得人鍾意，主要係佢嘅生產成本最低，比內地同業低出34%，比美澳南非等同業亦低28%；同時，國際金價升勢持續，亦增添佢嘅吸引力。在超額認購權行使後，紫金H股亦只係4億股，大戶再收乾啲，升勢又係一發難收。
紫金見高價6.8元後出現整固，形成上升三角形，升破6.4元，新升浪即可確認，以量度升幅計，目標指向8.5元。
郭兆誠