西貢嶂上有條被稱為「天梯」的陡斜山徑,最高點達海拔300公尺,不少行山發燒友都喜歡考驗自己腳骨力,故意由山腳上「天梯」,續登嶂上平原。同行兩美少女,原以為「天梯」只落不上,區區千多級石階就可以輕鬆過關,誰知落斜一樣難捱,苦了一雙菠蘿蓋。 記者:陳震霖
攝影:楊錦文(部份相片由友晟出版社提供)
模特兒:Angie、Steffie(Sunspot)
搵路去嶂上,一啲都唔難,高塘站落車,轉入海下路,直行大約15分鐘就係起點,登山之路唔算辛苦,三爬兩撥唔使2個鐘頭就到嶂上平原,每逢假日呢度好受歡迎,好多人鍾意一家大細嚟露營野餐,不過玩時玩,小心四周圍嘅暴躁牛牛,呢班大食怪,食草食極唔飽,慘得過又唔怕醜喎,問都唔問,失驚無神就搶食物,同城門水塘啲馬騮仔一樣咁惡呀。
臨行前,小記同兩美少女報料話唔使自備糧水,重同佢哋打賭:「信唔信山上面有士多?」佢哋起初半信半疑,上到平原,Angie話口渴:「喂,又話有士多嘅?」小記無講大話,許林士多有最出名嘅山水豆腐花(每碗$5),Steffie試味有感:「豆腐花,熱比凍嘅香滑。」咁大家識點揀啦!唔夠喉,整多碗腸蛋麵(每碗$18),買多支冰凍豆漿或五花茶(各$10),繼續上路。
許林士多
地址:西貢嶂上平原
翻查資料,由嶂上直落榕樹澳嘅「天梯」,最高點海拔300公尺,稱得上「天梯」,「級數」當然有番咁上下,小記邊行邊心算,估計最少有1,200級石階,重要唔係直路落山,路彎彎曲曲,周不時呈「之」字形,非常陡斜,你諗吓,由300公尺直落山腳榕樹澳,只需5分鐘多啲,唔行到腳仔軟就奇喇,Angie上氣唔接下氣:「無諗過落樓梯都咁辛苦,菠蘿蓋勁痠軟,腳都震埋。」
「天梯」有支路,沿住右手面山徑上全西貢最高石屋山,山頂有360度無敵大海景,東面遙望「香港三尖」之一蚺蛇尖,南面望到滘西洲同糧船灣洲,唔怕遲落山,睇埋夕陽殘照,附近島嶼同海面一片金黃色,個景靚到你唔信。
落到榕樹澳,去「龍村樂」玩埋四驅車至好走,車場30,000呎,雖然時速最盡每小時50km,但凹凸路面增加刺激感,緊張起上嚟,想煞車變加油,隨時唔小心甩尾入叢林;嫌四驅車唔夠激,約班Friend入「野戰樂」玩WarGame點睇先?戰場佔地64萬呎,可同時容納200人,場景有草原、山坡、叢林同溪澗,好有電影感。
四驅車同WarGame太激,唔啱玩?好!向水浪窩方向行多20分鐘落榕樹澳碼頭,打個電話,Call魚排負責人,佢會駛駁艇仔嚟碼頭接你出魚排釣魚,魚排24小時開放,有釣魚發燒友試過由星期五晚通宵釣到星期日先走,幾斤烏頭Call的士先拎得走。
龍村樂
地址:西貢西沙路榕樹澳村
電話:97104033
收費:每30分鐘$100
張生魚排
地址:榕樹澳魚排
電話:97593081
收費:10:00pm前走$80,10:00pm後走$100(包來回艇仔接駁)
野戰樂
地址:西貢西沙路榕樹澳村
電話:93080200
收費:$280包裝備連飯盒及來回市區專車,$160包飯盒及來回市區專車,但自備裝備。