港股在04年有好開始，滙豐（005）見新高。即將進入銀行炒業績期，滙豐繼續睇好。同其他當炒股比較，滙豐升勢慢啲，不過啲相關Call輪槓桿率大，升起上嚟回報亦屬和味，諗得過。
滙豐Call輪接近40件，交投勁，數據普遍唔錯，要揀對象唔難。9148今年4月到期，輪價1.03元，溢價1.0%，槓桿率12.0倍，9173喺7月到期，輪價90仙，溢價4.0%，槓桿率13.8倍。9136喺4月到期，輪價1.53元，負溢價0.6%，槓桿率8.1倍。9135今年6月到期，輪價1.54元，溢價1.1%，槓桿率8.1倍。向邊件埋手，視乎想搏殺程度而定。炒輪者個個都知，槓桿率較大嗰啲Call輪，回報較高，風險自然較大。
恒生（011）個勢亦係向上，吼Call輪，可供選擇則不多，一係交投麻麻，一係啲數據麻麻，正路對象得隻9162，4月到期，輪價48.5仙，溢價2.3%，槓桿率21.1倍。
東亞（023）係第一隻派全年成績表嘅銀行，但就算睇好炒輪，都冇對象可揀，Call輪兩件，9278冇成交，兼數據唔靚，9245少成交而數據只係勉勉強強。
中銀（2388）「披成」影響漸告淡化，股價穩步向上，搵輪炒，主角有9218，9月到期，輪價22.2仙，溢價8.8%，槓桿率6.7倍。
章盛