尖沙嘴文化中心前晚都算人頭湧湧，一邊廂有《酸酸甜甜香港地》重演，另一邊廂葉麗儀同香港交響樂團合演壓軸一場。
八方舊年睇咗套劇，今次專程為聽葉麗儀而來。一坐低，就見到前衞生福利局局長霍羅兆貞。問霍太，退休後做乜？佢笑咪咪話：「咪嚟聽吓歌。」咁有冇見舊老頂陳四萬，飲吓茶，敍吓舊？佢又係笑笑口答，「有，間中聚聚頭。」八方讚佢退得好時間，𠵱家做高官就辛苦得多，今次佢就只係笑，乜都唔講嘞。心照啦，跟住董老闆，邊個有得安樂？
講番個演唱會，以葉麗儀嘅聲線同台風，一啲都冇冷場，大家重記唔記得日本劇集《青春火花》隻主題曲改編嘅《結他彈個不停》，重有《上海灘》，都勾起好多老香港嘅回憶，人住澳洲嘅葉麗儀經歷過一場抑鬱病，今次重拾自信站起來，特別有意思。
（圖）前衞生福利局局長霍羅兆貞閒時都重有同陳方安生敍敍舊。
傳真︰2623-9278
電郵︰