新一年代表新希望來臨，伏勝希望今年個個讀者由年頭到年尾都賺到笑。之前伏勝提過嘅僑雄國際（381），喺復牌後唔覺唔覺升咗上0.48元，聽啲行家講，雖然隻股喺呢啲水平好多人都會覺得貴，不過喺呢個升市下，班芬佬為求要貨，好多時都唔計較個價升到乜嘢水平，唔少外資大戶喺年尾都趕住拎一箱箱白花花嘅銀紙嚟香港，希望買到貨，聽講隻僑雄就係班大戶其中一隻非常有興趣嘅股份。
據聞隻股啱啱泊到嘅碼頭來頭不小，中化國際母公司除咗係中國500大企業頭幾名外，重係中國第3大石油化工股，僅次於中國石油（857）同埋中國石化（386），今次拍中化國際，對僑雄嚟講絕對唔係咁簡單。
街外傳聞，中化國際今次拍僑雄只係第一步，嚟緊重會有好多猛料出籠，話唔定中化國際最後會入主埋僑雄，令到僑雄成為中化喺香港嘅窗口公司。雖然個傳聞有幾真暫時未知，不過伏勝估舊年有咁多外資追捧國企，有大型國企喺今年嚟香港開窗口公司一啲都唔出奇。
另一隻大家可留意下嘅股仔就係舊年年尾一拆五嘅御泰金融（2984），隻股仔喺拆細後被搶高，由0.141元升至上個禮拜五最高0.177元，升幅雖然已經兩成，不過班經紀朋友話重未玩完，因為個價突破舊年10月高位，加埋成交額配合，相信會有後着。
市場傳聞，話佢哋好似有單嘢同街外人密斟緊，而且重會喺短期內落實，至於單嘢係乜東東，伏勝就重係未搞得清楚。御泰金融呢隻股一向走勢都幾神化，呢價位再升多幾十個巴仙都唔奇。
伏勝