七年前，甄子丹有「雙失」經歷，執導的電影因投資者消失，令他要倒貼二百萬，煞科之日窮到一毛錢也拿不出，另一失則是三年婚姻破裂。不過甄子丹已漸漸收復失地，再婚贏得美人歸之餘，還憑電影《千機變》贏得金馬獎最佳動作設計，他由「雙失」變「雙贏」，全憑一對鐵拳！
甄子丹本來是香港打星，硬橋硬馬的南拳北腿真功夫，在影圈早被公認，但他從沒大紅過，反而近年他因緣際會打入荷李活，先後演出西片《幽靈刺客2變種復活》、《贖金之王2皇廷激戰》和《挑戰者之終極爭霸》，其中在《幽》片中更擔任武指。不過，最叫人嘖嘖稱奇的是，美國大前年播映其陳年舊作《鐵馬騮》，竟登上美國十大票房。
問甄子丹是否覺得在港的演藝路途不順利？他日前坦白地說：「係唔順利㗎，二十年嚟拍過咁多嘢，平地一聲雷咁紅就絕對唔係，但我都好幸運，可以有咁嘅成績。」
甄子丹透露在娛樂圈遇過四次良機，第一個是初入行時就遇上袁和平這個伯樂，給他機會主演《笑太極》和《奇門遁甲》等片；第二個是在《黃飛鴻2男兒當自強》中與李連杰激戰連場，贏得一致口碑，此後片約紛至；第三個機遇是拍亞視劇集《新精武門》，因他可以扮演偶像李小龍；最後一次良機便是能打入荷李活，從此名堂更響，回港後還憑《千機變》奪得今屆金馬獎最佳動作設計，令人印象深刻。
問甄子丹的低潮是哪個時期？他哈哈笑說：「每次機遇之後嘅『卡拉』位咪低潮囉，我諗九七年係最低潮，無論事業定私人問題都好難過，冇錢就已經好難過啦。嗰時我拍《殺殺人．跳跳舞》，因為個投資者消失咗，我自己攞咗成二百萬出嚟拍，拍到最後嗰日真係連一毫子都冇，於是我哋走去垃圾堆拍槍戰，剪爛啲玻璃樽做打燈，又彈啲玻璃樽當中槍，出到嚟票房又唔好。直至六個月後，有人打電話嚟話我部片揀咗做北海道嘅影展作品，嗰吓直情係一道曙光射落嚟。」
現在甄子丹於荷李活發展順利，但他沒有忘本，去年他便替港產片《千機變》擔任動作設計，他說：「呢幾年我冇接港產片，但我希望呢年做番演員嘅工作，再唔拍就老啦，呢幾年香港嘅動作片愈嚟愈少，我都想出分力。」
近幾年，香港再沒新一代打星出現，甄子丹笑說Twins在他心目中已算是新打女了，他說：「Twins兩個都好有潛質。阿Sa（蔡卓妍）醒目啲、高啲，手長腳長打出嚟嘅效果好睇啲。阿嬌（鍾欣桐）就勤力，樣就靚啲，兩個都有啲唔同。」至於男打星呢？甄子丹說：「霆鋒同周杰倫，我未同霆鋒合作過，但我知佢好博。我睇過周杰倫啲MV，佢都幾打得。」
