梅艷芳不但熱心公益，而且更有俠義心腸，早年阿梅除了以自己名氣提攜草蜢、許志安和譚耀文外，與阿梅相識二十多年的羅君左，當時沒有能力為亡母辦理喪事，阿梅即二話不說開出一張沒有銀碼的支票給羅君左，阿梅的一份恩情令羅君左銘記於心。
梅艷芳幫助朋友義不容辭，與阿梅相識二十多年的好友羅君左早年喪母，無力辦理喪事，阿梅即二話不說開出一張沒有寫上銀碼的支票給羅君左救急之用。
羅君左昨日在電話中說：「阿梅二十幾年前喺酒廊唱歌嗰陣，我已經認識佢。阿梅係一個好重情義嘅人，你幫助過佢一次，佢就會十倍奉還。記得佢選完新秀之後，我借過錢畀佢，數目唔係好多，總之嗰陣時我身上有一百蚊嘅話，就將九十九蚊借畀佢嗰種，呢件事阿梅好多年後都重記得。」
羅君左續道：「直至八七年，我媽咪過咗身，由於媽咪一病就病咗幾年，臨尾嗰半年佢重一直住私家醫院，為咗醫佢嘅病，我已經花盡所有積蓄，媽咪死咗，我成副身家只係得萬幾蚊，根本唔夠錢同佢辦喪事，當時我冇同阿梅講過，但估唔到佢失驚無神畀咗張冇寫銀碼嘅支票我，話如果我唔填銀碼上去嘅話就同我反面，嗰陣時我成個人崩潰，眼淚完全控制唔到咁湧出嚟……嗰次我只係填咗四千蚊左右嘅銀碼喺支票度，我同自己講，我有生之年，一定唔會忘記阿梅嘅恩情。」
羅君左愈說愈激動：「啲人成日話阿梅仗義疏財，以為佢身邊朋友黐實阿梅，無非係想佔阿梅便宜搵着數，但我想講句，你以為阿梅咁大個人唔識諗咩？佢自己冇判斷能力咩？阿梅已經唔喺度，我希望愛錫佢同尊重佢嘅人，畀佢安詳咁去，唔好再搞咁多是是非非！」
除羅君左之外，草蜢、許志安和譚耀文也曾受過阿梅恩惠，阿梅唱《愛將》時，便找來草蜢和唱及伴舞；安仔獲選新秀亞軍後曾鬱鬱不得志，阿梅先後要求唱片公司安排安仔與她合唱《將冰山劈開》及《笑看風雲變》，希望借自己名氣來扶後輩一把。
至於剛在平安夜當日於美國洛杉磯與女友舉行婚禮的譚耀文，昨日接受記者長途電話訪問時亦說：「佢去世界各地開巡迴演唱會，特登搵埋我同安仔佢哋，等我哋有機會開吓眼界，記得我為第一張唱片舉行記者會，嗰陣我係新人，根本冇人注意我，但身為superstar嘅阿梅，竟然失驚無神出現同我打氣，我真係感動到唔知講乜好。」
譚耀文邊說邊哽咽：「我好遺憾見唔到阿梅最後一面，好遺憾喺阿梅有生之年，我喺樂壇做唔到任何成績畀阿梅睇……我曾經同安仔及梅媽傾過電話，好想趕返嚟出席阿梅喪禮，但梅媽同安仔話我啱啱結完婚，紅白二事唔好撞埋一齊，我心情真係好矛盾！」
採訪：戴彩煥
