紡織金二十幾年前申請來港定居，從無到有，由低做起，今日已經上岸，久唔久就返鄉下捐吓錢，直情係錦衣還鄉，去到廣州更加享受十足，與當年窮措大嘅樣差得遠咯。
呢幾日紡織金睇陶傑寫老毛，忽有感觸，同左丁山講：「睇見老毛個名都驚，令我憶苦思甜，思甜係今日之甜，苦係昔日之苦。七六年老毛死訊傳開之日，我喺廣州某單位，當時話係大學畢業幾年，其實因為文革關係，冇讀完，但係叫做讀過書，七六年初因為參加批林批孔運動，俾人鬥爭，鬧我係臭老九，批林批孔假關心、真出賣，係潛伏人民群眾之中嘅壞分子。好彩領導對我有好感，我只係日日罰企，唔准坐。正在企到腳軟，疲倦不堪之際，突然聽到老毛死咗，又驚又怕，唔知以後會點樣。領導喝我即刻去大堂參加哀悼會，只見人人喊苦喊忽，慘過死阿媽，但我喊唔出，冇眼淚，領導指手篤腳，示意我快啲喊。我情急之下，走入廁所，搵啲尿液抹眼，一出番嚟就標眼淚，喊到似層層，逃過考驗！𠵱家諗起，好嬲又好笑，老毛搞到全國人民似木偶，無思想嘅行屍走肉，直情係殺千刀！打倒四人幫之時，我真係喊嘞，因為歡喜到飛起，喊到收唔到聲！」
紀念老毛喎，紡織金嗤之以鼻，認為無聊。佢認為中國最大嘅幸運，係鄧小平冇俾老毛鬥死，可以翻身推倒老毛政策，救活中國，如果中國人有話事權，天安門掛嘅可能係鄧小平像。