《標殺令》殺紅眼停不了
奧瑪求教劉家輝手刃仇人

對於唔少本地觀眾嚟講，舊年嗰部向七十年代亞洲電影取經嘅《標殺令》，可以話係○三年睇得最過癮嘅電影之一，女主角奧瑪花曼（UmaThurman）斬瓜切菜嘅大報復鏡頭，完全滿足晒觀眾追求視覺官能刺激嘅慾望。

專替演員鹹魚翻生
稱得上係cult片聖手嘅導演塔倫天奴（QuentinTarantino），聽聞喺下集《標殺令．終殺篇》會向六十年代意大利式西部片致敬。
由奧瑪所飾演嘅復仇新娘，一方面繼續向殺手組織派出嚟嘅殺手大開殺戒，另外又向由劉家輝飾演嘅殺手師傅白眉道人求教武功，但係成部戲嘅焦點所在，始終係奧瑪同大佬阿標嘅對決場面，而且片尾奧瑪重同個女重逢㖭。

《標殺令》前傳製動畫
塔倫天奴最叻令演員鹹魚翻生，佢今次邀請七十年代著名影星大衞卡拉甸（DavidCarradine）飾演大佬標，睇怕呢部戲之後大衞嘅人氣會直線上升。
另外，我羅拉又聽到塔倫天奴話諗住製作一部動畫版《標殺令》前傳，相信應該同上集講石井阿蓮身世嗰段嘅形式差唔多，塔倫天奴亦話會拍一部講幾個主角啲仔女嘅續集㖭。