2004年，相信會係歐洲車在港豐收嘅一年，因為除咗日前我哋曾作介紹、並有機會抵港發售嘅新車外，原來重有唔少歐洲新車「排期」推出，如標致407、福士Golf及富豪S40等等；睇嚟想喺今年買車或換車嘅車迷，都有好多選擇噃！
記者：鄭達基
預計抵港日期：04年6月
吸引指數：★★★★★
剛推出嘅全新標致407車系，無論係四門版抑或係走RV路線嘅407SW，皆予人耳目一新嘅感覺；因新車除擁有一個極富誘人魅力嘅造型之外，車廂配搭既豪華又實用，加上廠方為新車安排有多個引擎配搭選擇，如2.0公升（140匹）、2.2公升（162匹）及3.0公升（217匹），實能迎合不同用家需要。
預計抵港日期：04年6月
吸引指數：★★★★★
除全新407及407SW極有機會抵港外，同樣備受車迷注目嘅新款307CC開篷跑車，據聞亦有望於今年年中抵埗；新車造型突出吸引外，電摺硬頂開關亦見方便容易。引擎配搭方面，則以兩台2.0公升直4DOHC偈作核心，但經廠方精心調校後，輸出分別為140及182匹，再加上出眾嘅底盤結構，性能表現可謂毋庸置疑。
預計抵港日期：04年5月
吸引指數：★★★★★
自新代理上場後，瑞典富豪汽車不斷在港推出新車款，除日前提及過嘅全新V50外，新一代S40車系亦有望抵港發售；新車除外形極富吸引力外，經過重新設計嘅車廂鋪排，亦予人耳目一新嘅感覺。其中頂級版會以一台2.5公升直5低壓Turbo偈作配搭，馬力輸出高達220匹，日後廠方又會為其安排有更多引擎配搭供選擇，以切合不同用家嘅需要㗎！
預計抵港日期：04年12月
吸引指數：★★★★★
呢部可搭載四名乘客嘅SmartForfour，摒棄咗雙座位FortwoCoupe及FortwoCabrio嘅698cc直3Turbo偈，改為以1.1公升直3（77匹）、1.3公升直4（98匹）及1.5公升直4（112匹）引擎作動力核心，性能表現明顯較前增強不少；然而，新車造型及車廂陳設亦較原來嘅Smart型號來得吸引，相信勢必惹來一眾年輕車迷嘅注視！
預計抵港日期：04年6月
吸引指數：★★★★
屬第3代嘅新款歐寶Astra，除外形有大改動，並加入不少先進技術（如AdaptiveForwardLighting頭燈）外，車廂空間及設備配搭亦要較舊有型號來得更出色，匹配前後兩排承托力甚豐嘅座椅，乘坐倍見貼服舒適。至於最有機會抵港嘅，會係配用一台1.6公升TwinportEcotec引擎，馬力輸出達105匹嘅版本；而配用2.0公升Turbo引擎（馬力200匹）嘅頂級型號，抵港嘅機會亦唔細！
預計抵港日期：04年8月
吸引指數：★★★★★
一直成為占士邦座駕嘅雅士頓．馬田（AstonMartin）跑車，向來備受車迷追捧，當中一款DB7更係焦點所在；然而，廠方早前宣布會推出全新DB9系列，以饗車迷，其中硬頂版型號更有望於今年8月左右抵港，隨後一款開篷版（見圖），亦有望於年底抵埗。廠方更會為新車安排有一台6.0公升引擎作核心，輸出達450匹，絕能叫人一試難忘。
預計抵港日期：04年５月
吸引指數：★★★★★
向來備受車迷追捧嘅福士Golf車系，屬第五代嘅新型號，配用一個圓渾而流暢嘅造型，既獨特又吸引之餘，車廂內嘅全新一體式中控台配搭，設備齊全唔在講，用落重好方便容易㖭！另外，據聞代理初時會以配用1.6公升FSI引擎嘅版本，率先打入香港市場，隨後會再引入埋配用2.0公升FSI引擎嘅版本抵港。
預計抵港日期：04年5月
吸引指數：★★★★
自推出以來，一直備受各界好評嘅平治C-Class，坊間有傳廠方會喺今年為其推出Facelifted新版，雖然據知外形沒有多大改動，但車廂鋪排卻予人新鮮感；與此同時，又有消息指C-Class會推出配用5.5公升V8偈嘅C55AMG頂級跑版，並極有可能配用全新7前速半自動波箱。若然屬實的話，試問作為平治Fans嘅你，又點可以錯過！
預計抵港日期：04年7月
吸引指數：★★★★
法國雷諾Scenic車系一直廣受用家歡迎，而於較早前推出嘅全新ScenicⅡ，除造型屬全新設計，並擁有家族式鬼面罩配搭外，較原有型號多出80mm（達4250mm）嘅車長，更能營造出一個更闊落嘅車廂空間；至於引擎配搭方面，最有機會抵港嘅相信會係以一台2.0公升（馬力136匹）引擎，作為動力核心嘅版本。有興趣嘅你，不妨留意一下噃！
預計抵港日期：04年8月
吸引指數：★★★★
走家庭式MPV路線嘅福士Touran，包裝講究時尚有吸引力之餘，車廂空間又見闊落，就算坐足七名乘客都唔覺擠迫，低重心設計重方便乘客上落，當然重有齊全嘅車廂設備配搭啦！另外，據知抵港嘅新車，將會以一台新開發嘅2.0公升FSI引擎作主打，輸出充裕之餘，加上德國車所予人嘅高安全性，勢必惹來車壇一陣哄動。
預計抵港日期：04年8月
吸引指數：★★★★★
屬旗艦級車系嘅奧迪A8，自推出以來甚受商賈富豪歡迎；然而，廠方於早前宣布會為A8長陣版，加入配用6.0公升V12偈（馬力450匹）及Quattro恒式四驅嘅新款A8L6.0Quattro型號，以吸引更多車迷注意。
預計抵港日期：04年2月
吸引指數：★★★★
至於另一款備受追捧嘅Espace車系，有傳代理將會引入配用2.0公升Turbo偈（馬力165匹）嘅型號抵港，從而令車子較傳統配用自然吸氣引擎嘅型號，起跑加速表現來得更強嘛！至於造型及車廂配襯，亦都予人有一份新鮮感呢！
預計抵港日期：04年10月
吸引指數：★★★★★
以富士Impreza作設計平台嘅紳寶9-2X，除以近年流行嘅五門Wagon形象示人外，寬敞闊落嘅車廂空間，以及實用車廂設備配搭，亦為新車賣點之一；同時，廠方又為新車嘅Linear版，起用一台2.5公升自然吸氣引擎（馬力165匹）作配搭，而頂級Aero版則為2.0公升水平對向四汽缸Turbo偈，馬力輸出更高達227匹，輔以一套恒式四驅系統，性能表現絕能令人留有深刻印象。
預計抵港日期：04年5月
吸引指數：★★★
新款奧迪A3不但造型較原有型號來得出眾吸引之餘，就連車廂布局亦屬全新配搭，當然唔少得重有齊全嘅車廂設備啦！而最有機會抵港發售嘅型號，相信會係以一台2.0公升FSI偈作核心，輸出充裕之餘，匹配一套Tiptronic半自動波箱，表現毋庸置疑。
