「哨牙仔」朗拿度趁住西甲聯歇冬假期，返咗老家巴西過聖誕，重做埋派對搞手，請埋卡洛斯及查明夏等一大班球星去玩，當中重有個日本人，正是中田英壽！
可能有球迷奇怪「壽仔」同朗拿度及卡洛斯等皇馬及巴西球星，大纜都扯唔埋，又會咁有「飛士」嘅？我求大俠諗到佢哋都係同一個牌子嘅贊助球星，互相認識都唔出奇；重有就係大家都係鍾意食魚嘅貓，去派對咪又係諗住𠝹吓女，呢樣實啱傾啦！
最近中田英壽終於被帕爾馬借走去博洛尼亞，我求大俠見佢近年愈嚟愈頹，希望佢玩埋呢次，下半季喺博洛尼亞會踢番啲生性波啦！
贏百萬富翁慈善騷
國米前鋒韋利同埋AC中場加度素，早幾日喺意大利百萬富翁慈善騷中合作贏得十五萬歐元（約一百四十六萬港元），砌低其他多位球星。咪睇佢哋咁粗獷，答問題有紋有路，又曉拖延時間博主持畀貼士，兩人顯然係食腦一族。最搞鬼都係兩件大塊頭好似婆乸咁密斟，笑爆嘴。
泰國辦學幫細路
喺德國壞事做盡（打人襲警勾義嫂）嘅前德國國腳艾芬保，估唔到亦有一顆善心。話說佢原來早喺九九年就成立一個慈善基金，幫泰國嘅貧窮細路；最近佢又打算喺泰國開足球學校，令有潛質嘅年輕球員可成材。中國人話做得壞事多就要積陰德，睇嚟艾芬保都好明白呢個道理。
3千萬賣去烏克蘭
新星杜里今季係阿仙奴表現突出，搞到佢細佬耶亞杜里都變搶手貨，烏克蘭球會薩克達向比利時比華倫出價二百一十萬鎊（約二千九百萬港元）收購，比華倫主席尹荷夫都嚇咗一跳，話今次交易係球會歷史性時刻，無諗過會賺咁多。耶亞值唔值咁多錢，真係要問薩克達高層先知！
同大郅陽光與海灘
史上第一個擁有NBA冠軍指環嘅中國球員巴特爾，噚日俾速龍交易咗去魔術，咁啱佢嘅舊戰友王治郅又喺熱火效力，以後兩個可以成日約出嚟去盡情享受吓佛羅里達州嘅陽光同海灘，咪好過留喺楓葉國凍冰冰喇！話唔定轉咗個大運後，以後可以有多啲出場機會㖭！