新的一年，果然有好的開始，恒指衝上12800大關，大升225點，創下今個升浪新高，成交193億元，上升股（不計認股證）有490隻，升勢頗為全面，國企股升勢真係一發難收，國指高收5363，大升342點，升幅6.8%，成交更大增到41億元。
國企全面上揚，到噚日為止，基金重係咁買，呢個浪，佢哋究竟睇幾多？上月中，當時大市調整，恒指落到12100水平，國指則見4050，芬佬已經大派定心丸，話個市唔會有事，不過12月下半月假期多，大市會橫行整固，過咗元旦，升浪再起，可以升到你唔信。果然俾佢哋講中晒。
真係唔到你唔信，兩隻國指重磅成份股，中石油（857）同中石化（386），升完可以再升，噚日又分別再升多9.0%同10.8%，高收4.85元同3.85元。04年第一日，中石油同中石化嘅股價就升到呢個位，有幾多人估得到？
國企上月中調整，落到4050水平，真係千載難逢嘅低吸機會，芬佬當時好有信心，話國企調整已完成，見平就要買，後市有排升，又估唔到佢哋竟然買到今時今日。
不過，股價有升亦有跌，升得急亦必然會出現調整，好似中石油，9RSI已去到93.3，而中石化亦去到89.5，已出現大超買，即使大戶要造指數，係咪等呢兩隻重磅股調整一下，然後再上，更為健康呢？
基金近期主力買住嗰兩隻石化股，亦係大超買，上海石化（338）9RSI已經88.4，北京燕化（325）更去到94.8，又係要到唞氣時候。不過，要造指數，重有好多國企可以接棒，噚日就見到金屬股發力，呢類股份近期喺高位牛皮，整固咗有一段短時間，下個禮拜會由佢哋接力而上。
3隻鋼鐵股中，馬鋼（323）同重鋼（1053）係基金主力集貨對象，目標價早前已提過，重鋼係5.5元，馬鋼係3.5元，而兩股嘅9RSI，亦分別只係61.0及69.1，上升空間好大，由於基金已開始發動攻勢，相信一兩個月內，重鋼同馬鋼都可以升到目標價。
郭兆誠