重記唔記得N年前嗰套《同一屋簷下》呢？喺戲裏面經常出現嗰隻日本土狗──柴犬，雖然貌不驚人，甚至有幾分似我哋嘅唐狗，但原來背後大有來頭。牠不僅被日本官方認證為「六大日本原生犬種」，其機警、忠實、具責任感的個性，更被視為「日本精神」的象徵。不過千祈唔好俾佢敦厚純良的外表呃到，其實柴犬好活潑百厭，重似足性格巨星咁多變，拜訪完這個一家三口的柴犬Family便知道。
記者：尹珊珊
攝影：陳智良
在日本與秋田犬、北海道犬等同名的柴犬，是體形最小也是歷史最悠久的日本土生犬，早於三十年代被日本政府認定為「活化石」（即天然紀念物）。雖然柴犬是日本隨處可見的土狗，但移民香港的數目卻少之又少。狗主Godfrey道：「日本人唔係咁鍾意同中國人做生意，想買純種柴犬要經得起耐性，好似我三年前購入一對柴犬，都係在當地狗展搵咗幾個繁殖者，到最後來回飛過日本幾次先成事，大大話話使咗起碼十萬蚊。」據講現時移居在香港的純種柴犬不出三十隻，認真矜貴。
小柴係全屋最細嘅成員，亦係最活潑好動嘅一個，平日最鍾意四圍走，得閒無事又鍾意同損友Queenie玩相撲，搞到屋企經常上演肉搏場面，主人都話佢精力旺盛無時停。由於小柴阿哥肥肥好自閉，又成日扮cool唔睬人，所以由出世開始，小柴就鍾意黐埋Queenie度，雖然大家同狗唔同種，但係佢哋好夾㗎，就連Queenie都淨係鍾意同小柴玩。可能小柴性格夠調皮可愛，今年狗展重贏埋最佳高級幼犬（家庭犬組）大獎，為主人爭光。
肥肥雖然同小柴同一胎，但係無佢咁百厭，淨係識得群埋Queenie玩，女仔人家一啲矜持都無。肥肥份人比較內向孤僻，平日鍾意柄埋一邊諗吓嘢，最唔鍾意嗰啲無喇喇摸住佢個頭，一路猛講「卡娃兒」嘅陌生人。可能肥肥嘅眼神幾憂鬱，又好似識放電咁，有人話佢似梁朝偉喎！聽主人Godfrey講有好多女仔都鍾意撩佢玩，重話三隻狗仔中肥肥生得最靚仔，又最有純正柴犬的優良風範，但因為肥肥唔鍾意人類，所以都費事迫佢參加狗展！
「蠢材！蠢材！」咪聽到主人低八度咁叫，就以為佢真係叫蠢材。佢個名其實叫春菜，由日本移民嚟香港差唔多有三年，重未有三粒星，但由於春菜天生適應能力強，到埗無耐重生埋三件化骨龍。雖然做咗人阿媽，但身手一樣好到家，強項係打排球，最厲害的一次係用手將蝙蝠擊落。無花無假㗎，位於郊外嘅狗場成日有蜜蜂、飛蛾自投羅網，早排重有隻唔知驚嘅蝙蝠飛入屋，有人嘅手掌咁大，不過最後都俾春菜一掌打到飛埋牆，Godfrey話唔知隻蝙蝠撞死定俾佢拍死，總之死因不明啦！
原產國家：日本
種類：小型狩獵犬類
主要用途：狩獵小動物、雀鳥
身高：雄犬高14.5-16.5吋
雌犬高13.5-15.5吋
體重：雄犬約重12千克
雌犬約重10千克
壽命：15-20年
身價：$20,000以上
柴犬聰明、機警、善良、溫馴，有過千種優點，但絕對唔包括精力旺盛呢瓣。原本只係想同班大爺影埋張合照收工，點知肥肥專唱反調，見人上樓佢落樓，主人叫到都無面畀。好喇！等得肥肥出現，嗰頭春菜又無咗影。搞足三粒鐘，最後都要使橫手監生放入籠，先至勉強影到一張全家福。
1.柴犬披毛既短而貼，本身又有潔癖，打理非常容易，只需隔日為牠梳毛，每隔三、四個星期洗澡一次則可。
2.柴犬活躍度和運動量屬中等，每天帶牠出外散散步，有適量的走動便已足夠。
3.柴犬身形細小，要控制食量，否則會過胖。
