舊年聖誕節前，經紀黃話工銀亞洲（349）係傳聞有可能進行批股集資的股份之一，現在工銀公布落實收購華比富通銀行後，由於全世界都話工銀買嘢買得便宜，所以股價昨日急升9.77％。經紀黃話，江湖又再有佢會配股集資之聲音。
工銀昨日復牌，升9.77％，收11.8元，成交股數957萬股，金額1.1億元。
工銀今次係以21.57億元，收購華比富通銀行，其中15.45億元係畀現金，其餘就印已擴大後股本9%的公仔紙支付。由於印出嚟嘅公仔紙有3年的禁售期，所以就算作價較市價有大折讓都好，暫時都唔會對股價構成影響。
至於要畀嗰15億銀，工銀就話可以用內部資源、發債或者股本融資，但經紀黃就話，由於家陣市場氣氛咁好，傳聞已有證券行摩拳擦掌，想話幫工銀批股，所以工銀股價短線尚可繼續看好咁講。
另外，經紀陳同小初一直唔相信會賣盤嘅EVI教育（8090），噚日續升，收0.129元．升19.4％，經紀陳再收風，話就算賣盤都好，應該係賣畀相熟朋友，若果唔係，有咩理由將股價炒到咁高。
慕容小初