今時今日重用緊錄影帶錄電視節目？實在太Out喇！只要有部DVD數碼錄影機，除咗可以完全取代傳統錄影機外，功能更係有過之而無不及，畫面質素更可大大提高，淨係可以錄影過千次，畫質都唔會下降已經值得一讚，重想知道多啲DVD錄影機嘅玩法？今日就同各位逐一介紹！
記者：許福合 攝影：蔡鴻雯
ImageGirl：Patsy
話到明係錄影機，即係轉用DVD碟代替錄影帶，預校錄影、搜畫等功能都唔會缺少，錄影時間更長，加上使用數碼錄影，唔鍾意睇廣告更可使用剪輯功能將廣告飛走，真正做到好戲連場！部份高速型號更提供邊睇邊錄同步錄影。例如一場球賽毋須中斷錄影，就可以開始重播，唔使等完場即刻有得睇。另外最正梗係唔使回帶立即開片，而錄影帶多次使用後，質素會愈來愈差，最慘重係食帶，呢啲情況就統統唔會喺DVD錄影機上發生。
現時巿面嘅DVD錄影機因為DVD制式唔同，功能略有出入，大至上可以分為DVD-RAM同DVD+RW兩大陣營，小記就專程訪問過影音發燒友阿Keith，阿Keith認為若以錄影電視為主，DVD-RAM因為可以自動搜尋碟上空間再燒錄，原有影像唔會受到影響，而且可燒錄上萬次，Nicam雙語都可以同時錄下，自用就最啱。
至於DVD+RW一般只可以錄到1千次，但兼容性比DVD-RAM高，大多數DVD影碟機都睇得到，加上可以入碟即用及唔使封碟（即將資料封閉於碟內，該碟不可再錄，但方便於其他DVD上播放），兼容性最高，替朋友錄影必選+RW。
精選推介
正所謂貴有貴玩，平有平玩，DVD錄影機都唔例外，價錢可以相差數千，以下3部高中入門級任你挑選！
PanasonicDMR-E100H係DVD-RAM陣營嘅代表，最長可錄到6個鐘，使用RAM碟時，可以一按即錄，唔使擔心會洗咗之前錄下嘅節目，亦具備同步錄播及剪接等功能。另外，此機更內置80GB硬碟，錄影時可以揀硬碟錄影作為後備，淨用硬碟就已經可以錄足106個鐘，加上具備逐行掃描，可以欣賞到較佳畫質。
查詢：28330955（信興電器）
Philips嘅DVDR77就以DVD+RW燒錄為主，最特別係使用全新MPEGII編碼器，擁有特長8小時錄影時間，而且附設有圖像目錄，配合兼容性較高嘅+RW，喺其他DVD機或電腦上欣賞都無問題！亦具備PCMCIA及IEEE1394，方便睇相同接駁DV之用。
查詢：26199663（PhilipsHK）
若果你要求比較簡單，呢部TechnosonicNDR-100B會係一部唔錯入門級機種，售價只要$2,790，可以DVD+RW及DVD+R錄影，最長4個鐘，基本錄影功能齊全，亦有IEEE1394插頭，相當抵玩！
查詢：27577861（
