梅艷芳日前病逝後，生前好友不停為她的身後事奔波，昨日下午一時許，劉培基到達殯儀館打點。
對於梅媽前日表示要爆大鑊，劉培基說：「我唔知內容，梅媽可能掛住個女，所謂爆料，係講同個女嘅感情啫！可能佢好傷心，所以佢有少少抑鬱，好難怪佢嘅。」
至於梅媽指阿梅身邊有一班好同壞的朋友，劉培基說：「每個人身邊都有好同壞嘅朋友，阿梅咁大個人識分㗎啦。」劉培基透露正在為阿梅做壽衣，他說：「我知要點做，詳情下星期先講。」
此外，有傳阿梅的朋友不滿其經理人王敏慧（Marianne），而劉培基過去一直負責阿梅演唱會的歌衫，但近兩次個唱的歌衫則由Marianne打理，不過昨日劉培基否認與Marianne不和。
劉培基說：「如果我哋不和，點可能一齊食飯，我唔會同一個唔鍾意嘅人食飯，由佢幫阿梅開始，我已經覺得佢係一個好好嘅小妹妹，我哋可以拖住手，點會有問題？」
有傳Marianne不讓朋友接近阿梅，劉培基說：「佢有難言之隱，出發點都係為阿梅好，希望佢多啲休息，個個對阿梅都好好，好錫佢，佢契媽、蘇小姐個個都好難做，知道好多人想見阿梅，但佢醫緊病，真係冇辦法。」
採訪：林妙萍、何永寧
攝影：陳慧安